Shumë biznese nuk morën nga 290 euro për punëtorë

08:59, 09/05/2021

Disa biznese individuale që ishin të mbyllura për muaj të tërë për shkak të masave kufizuese vitin e kaluar si pasojë e pandemisë, nuk kanë marrë ende mbështetjen financiare të premtuar nga shteti, prej 290 euro për punëtor.

Një ndër këto biznese individual, është edhe një biznes nga Gjilani, që nuk mori asnjë cent, e që për këtë, ka bërë disa ankesa në Ministri të Financave dhe në Administratën Tatimore të Kosovës.

Këta të fundit, pranojnë se janë ende disa biznese që nuk kanë përfituar nga kjo masë, por thonë se janë duke i shqyrtuar ankesat e tyre nga Komisioni përkatës dhe do të marrin përgjigje të shpejtë.

Tansu Emini nga ky biznes tregon se është taksapagues për më shumë se 12 vjet, dhe mbetet i diskriminuar nga shteti karshi atyre bizneseve që përfituan gati nga 1 milion euro dhe nuk ishin të mbyllura në kohë pandemie.

Emini ka thënë se nga dhjetë euro janë të detyruar të paguajnë për çdo muaj për kartelën bankare të biznesit, në anën tjetër sipas tij, asnjë cent nuk morën nga shteti edhe pse ishte kriter nga ATK-ja për këtë kartelë.

“Biznesi dy punëtor i ka, unë edhe babi, të regjistruar jemi, prej tetorit na kanë thënë me hap llogari të biznesit dalin paratë. Tri herë ankesë kemi bërë, por prej 16 tetorit e deri më sot paratë nuk kanë dalë, pra asnjë cent, vetëm atë nga 170, asgjë tjetër... (3;07) Ato (qendrat tregtare) kanë punuar kanë marrë para, ndërsa ne s’kemi punuar edhe shumica e kolegëve që jemi me lokale brenda, vetëm dy veta i kanë marrë paratë, 20 jo”, ka thënë Emini.

Zëdhënësja e ATK-së, Valentina Bytyqi-Sefa ka thënë se secili tatimpagues që nuk ka arrit të marrë mbështetjen prej 290 euro, fillimisht duhet të bëjë ankesë, të cilat shqyrtohen shpejt nga Komisioni përkatës.

Ajo ka inkurajuar tatimpaguesit në fjalë dhe të gjithë tatimpaguesit të tjerë të cilëve ende nuk iu kanë kaluar mjetet në llogari të komunikojnë me Komisionin përkatës ose të bëjnë pjesën e ankimimit.

“Të gjitha bizneset të cilat i kanë freskuar të dhënat e tyre automatikisht i kanë marrë, ndërsa bizneset të cilat nuk i kanë plotësuar të dhënat e tyre ata nuk i kanë marrë sigurisht... Për rastin në fjalë për shkak të konfidencialitetit, mirëpo ne kemi adresuar tek komisioni përkatës dhe shumë shpejt do të kemi një përgjigje për verifikim nëse biznesit i kanë dalë mjetet. Kemi shumë raste, edhe individualisht që kanë bërë kërkesë tek Komisioni përkatës se nuk iu kanë kaluar mjetet në llogari. Por, pas verifikimit, mjetet veç kanë kaluar në periudhën e caktuar në llogarinë ndoshta edhe nuk kanë arrit t’i identifikojnë për shkak edhe të rrjedhës së mjeteve të tjera, por ndoshta edhe për shkak të mos kujdesit për verifikim. Si do që të jetë për rastin në fjalë ne shumë shpejt do të mund të ju informojmë, por me autorizim”, ka thënë Bytyqi - Sefa.

Ndërsa, Ministria e Financave, Punës dhe Transfereve nuk është përgjigjur për KosovaPress lidhur me zbatimin e kësaj mase dhe për numrin e ankesave në këtë Ministri.

Ish-ministri i Financave, Haki Shatri ka thënë se nuk përjashtohet mundësia që t’iu bëhet hile disa bizneseve që nuk kanë ndonjë lidhje për përfitim nga shteti, ani pse janë tatimpagues të rregullt.

“Disa kanë proceduar me vonesë, disa kanë qenë më azhur dhe i kanë prezantuar të dhënat e veta. Dikush ka edhe të njohshëm në institucionet e shtetit dhe më lehtë depërton, disa s’janë paraqitur dhe i kanë paguar obligimet dhe s’ka pasur nevojë me i njohur ata njerëz personalisht dhe atyre normalisht që kapak munden me iu bërë hile aty”, ka thënë Shatri.

Më 28 shtator 2020 Qeveria Hoti në atë kohë, kishte marr vendim për ndarjen e 60 milionë euro për subvencionimin e pagave të bizneseve aktive.

Ish-ministrja e Financave Hykemete Bajrami pati thënë në atë kohë se këto mjete ishin ndarë nga Fondi për Rimëkëmbje Ekonomike i Qeverisë së Kosovës në bazë të listës së numrit të punëtorëve të regjistruar që kanë kompanitë. Për këto biznese, nga ky Fond i cili kap vlerën e mbi 350 milionë euro, do të ndahen 60 milionë euro. Po ashtu sipas deklaratës së saj, në listën e përfituesve të kësaj shume prej 60 milionë eurove janë mbi 90 mijë biznese me mbi 200 mijë punëtorë.

Ditë më parë ministri aktual i Financave, Punës dhe Transferve ka publikuar listën e 50 përfituese për punëtorë.

© SYRI.net

Lexo edhe:

• Aksionar në biznes, shtëpi, lokal, kjo është pasuria e Xhelal Sveçlës
• Kosova përfiton 90 milionë euro nga Banka Botërore
• Rritet çmimi i naftës menjëherë pas sulmit të Izraelit drejt Iranit