Qindra bullgarë ngrihen në protestë kundër Gazprom

11:52, 11/08/2022

Qindra bullgarë dolën në rrugët e kryeqytetit Sofje të mërkurën, duke shprehur frikën se qeveria e përkohshme e vendit mund të thyejë politikat e paraardhëses së saj properëndimore dhe t'i rikthehet lidhjeve të ngushta energjetike me Rusinë.

E dyta në serinë e planifikuar të protestave nën sloganin “#GAZ with me” u zhvillua përpara ndërtesës presidenciale dhe organizatorët thanë se duan më shumë llogaridhënie nga kabineti kujdestar.

Shumë njerëz në Bullgari - një vend anëtar i BE dhe NATO - janë të shqetësuar se qeveria e mëparshme pro-perëndimore u rrëzua në qershor për shkak të qëndrimit të saj të ashpër kundër pushtimit rus të Ukrainës dhe refuzimit për të paguar gjigantin rus të energjisë Gazprom në rubla, valutë.

Në fund të prillit, Rusia ndërpreu furnizimin me gaz për Bullgarinë, kombin më të varfër të BE, pasi kjo refuzoi kërkesën e Moskës për të paguar në rubla. Marrëdhëniet midis dy ish-aleatëve të bllokut sovjetik u rënduan nën qeverinë e mëparshme.

Deklaratat e para publike nga qeveria aktuale e përkohshme, e emëruar nga presidenti Rumen Radev, tregojnë se Bullgaria mund të rifillojë bisedimet me Gazprom për të shmangur mungesën e gazit natyror gjatë këtij viti.

“Ne refuzojmë të jemi të varur nga Gazprom dhe të financojmë luftën e egër të Putinit!” lexoi një nga pankartat e protestës.

Atanas Sharkov, një nga organizatorët e protestës, i bëri thirrje Radevit, i cili mban përgjegjësi të drejtpërdrejtë për veprimet e qeverisë së përkohshme, të garantojë se vendimet e mëparshme nuk do të ndryshohen.

Ai këmbënguli se Gazprom duhet të pushojë së qeni furnizuesi i vetëm i gazit i Bullgarisë. “Është koha për të ndjekur politikat evropiane dhe për të qenë pjesë e Evropës”, ​​tha Sharkov.

Muajin e kaluar, krerët e Greqisë dhe Bullgarisë kremtuan përfundimin e një tubacioni të ri që do të furnizojë gaz natyror nga Azerbajxhani në Bullgari. Ata thanë se dërgesat komerciale pritet të fillojnë deri më 1 tetor.

© SYRI.net

Lexo edhe:

• Presidenti iranian kërcënon Izraelin: 'Nëse na sulmon, nuk ka gjasa të mbetet diçka nga shteti hebre'
• Çfarë ndodh me lejen e qëndrimit në Zvicër nëse divorcoheni?
• Të paktën 10 sulme xhihadiste u parandaluan në Evropë më 2023