Menjëherë pas inaugurimit të presidentit Joe Biden në mesditën e 20 janarit, në rrjet dhe në shumë media online u publikua e ashtuquajtura letër që Donald Trump i kishte lënë në Zyrën ovale pasardhësit të tij.
Në këtë letër, të pretenduar si të vërtetë, shkruhej: Joe, edhe ti e di që unë kam fituar!
Por e vërteta është se kemi të bëjmë me një Fake News, edhe pse stili i kësaj letre ngjason shumë me profilin dhe qëndrimet sistematike të Trump.
Të gjithë këtë tymnajë, e ka sqaruar vetë presidenca e re.
“Ish-presidenti Donald Trump respektoi një traditë tre-dekadëshe të udhëheqësve amerikanë në largim, duke i lënë pasardhësit të tij, demokratit Joe Biden, një letër në Zyrën Ovale”, konfirmoi fillimisht Shtëpia e Bardhë.
I pyetur nga gazetarët për përmbajtjen, presidenti Joe Biden u përgjigj nga Zyra Ovale se letra ishte shumë bujare, por se nuk mund të zbulojë përmbajtjen e saj pa biseduar paraprakisht me ish-Presidentin Trump.
Duke marrë parasysh largimin nga Uashingtoni para mbarimit zyrtar të mandatit të Trump në mesditën e së mërkurës, dhe mungesën e tij në ceremoninë inauguruese të Presidentit Biden, u ngritën pikëpyetje nëse zoti Trump do t’i përmbahej traditës së filluar në 1989 nga Presidenti Ronald Reagan.
Trump nuk e ka pranuar humbjen në zgjedhjet e 3 nëntorit dhe ai dhe Biden nuk kanë folur që para ditës së zgjedhjeve presidenciale. Presidenti Trump nuk e përmendi me emër presidentin Biden as në fjalën e shkurtër të lamtumirës në një bazë ajrore jashtë Uashingtonit.
Presidentët e kaluar kanë lënë letrat e tyre në tavolinën e Zyrës Ovale të Shtëpisë së Bardhë, ku presidentët e rinj kanë gjetur urime të mira, menjëherë pas fillimit të mandatit të tyre katër vjeçar.
Presidenti Reagan e filloi traditën, duke i thënë ish-nënpresidentit të tij dhe presidentit të ardhshëm George H. W. Bush: “George, unë çmoj shumë kujtimet që ndajmë dhe ju uroj gjitha të mirat. Ju do të jeni në lutjet e mia”.
Katër vjet më vonë, Bush uroi rivalin e tij demokrat, Bill Clinton, që e kishte mundur atë në zgjedhjet e nëntorit.
“Suksesi juaj tani është sukses i vendit tonë. Unë tani do t’ju mbështes fort”, tha ai.
Pas dy mandateve në Shtëpinë e Bardhë, Clinton i tha pasardhësit të tij, George W. Bush, djalit të ish-rivalit të tij George H.W., në vitin 2001: “Ju do të drejtoni një popull krenar dhe të mirë. Dhe që nga kjo ditë, ju jeni presidenti i të gjithë neve. Ju përshëndes dhe ju uroj suksese dhe shumë lumturi”.
Pas tetë vjetësh si president, Bush i ofroi demokratit Barack Obama urimet e tij më të mira në vitin 2009: “Do të ketë momente sprove. Kritikët do të marrin zemër. ‘Miqtë’ tuaj do t’ju zhgënjejnë. Por, ju do të keni një Zot të Plotfuqishëm për t’ju inkurajuar, një familje që ju do dhe një vend që po ju mbështet, përfshirë mua.”
Ndërsa kur u largua nga detyra katër vjet më parë pas dy mandateve në detyrë, Obama i uroi presidentit Trump, edhe pse ai kishte bërë fushatë në vitin 2016 për demokraten Hillary Clinton.
“Urime për një fushatë të jashtëzakonshme”, thuhej në letrën që Obama la për Presidentin Trump.
“Miliona njerëz i kanë vendosur shpresat e tyre tek ju, dhe të gjithë ne, pavarësisht nga partia së cilës i përkasim, duhet të shpresojmë për begati dhe siguri të zgjeruar gjatë mandatit tuaj. Unë dhe Michelle ju urojmë më të mirën juve dhe Melania-s ndërsa nisni këtë aventurë të madhe dhe e dini që ne jemi gati të ndihmojmë në çdo mënyrë që të mundemi”, shkruhej aty mes të tjerave.
Kishte pikëpyetje në Uashington nëse Presidenti Trump do ta ndiqte shembullin me një shënim për Presidentin Biden, sepse zoti Trump tashmë kishte thënë se ai planifikonte të thyente një varg traditash të vjetra që lidhen me tranzicionin paqësor të pushtetit në Uashington.
Presidentët që largohen zakonisht përshëndesin pasuesit e tyre në Shtëpinë e Bardhë në mëngjesin e ditës së inaugurimit dhe ata udhëtojnë së bashku drejt Kapitolit të Shteteve të Bashkuara për ceremoninë e inaugurimit të presidentit të ri.
Por presidenti Trump u largua nga Uashingtoni të mërkurën në mëngjes pas një ceremonie lamtumire ushtarake në një bazë ajrore jashtë Uashingtonit, duke hipur në avionin presidencial Air Force One për herë të fundit për një fluturim drejt rezidencës së tij përballë oqeanit Atlantik në Florida.
Kjo është hera e parë në 152 vjet që një president amerikan në largim nuk merr pjesë në ceremoninë e betimit të pasuesit të tij, normalisht një akt publik që simbolizon transferimin paqësor të pushtetit në demokracinë amerikane.
Ish-presidenti Trump, një manjat i pasurive të patundshme i shndërruar në politikan republikan, ka bërë akuza të pabazuara për manipulim të zgjedhjeve edhe pse dhjetëra gjyqtarë, disa prej tyre të emëruar nga vetë ai, nuk gjetën prova thelbësore të mashtrimit që do të kishin vënë në pikëpyetje fitoren e zotit Biden.
Pikërisht mbi këtë qëndrim u ndërtua edhe fabula fake e letrës që u bë virale në rrjet, por që duke se është Fake News.
© SYRI.net
DOKUMENTI/ Zbulohet letra e Agaçit: Po, jam i përfshirë në marrëveshjen për emigrantet
VIDEO/ Teliti: Taksimi për profesionet e lira, taksë kriminale që i vendoset trurit
Presidenti iranian kërcënon Izraelin: 'Nëse na sulmon, nuk ka gjasa të mbetet diçka nga shteti hebre'
Denonco
Merrni lajmet më të fundit nga SYRI.net në çdo moment dhe kudo që të jeni!
