Bastisen zyrat e PE gjatë karantinës/ Vidhen kompjutera, tableta dhe sende të tjera

16:27, 01/07/2020

Ndërsa ishin larg Brukselit pas periudhës së shpërthimit të koronavirusit dhe karantinimit të qytetarëve në të gjithë botën, të paktën 50 eurodeputetë kanë deklaruar kompjutera, tableta dhe sende të tjera të vjedhura, nga zyrat e tyre në Parlamentin Evropian.

Mesa duket, vjedhjet kanë ndodhur ndërsa ndërtesa ishte e zbrazët, ku hajdutët kanë shkelur nëpër gazeta dhe kanë thyer dollapët në zyrat e eurodeputetëve, për të marrë sende të vlefshme.

Në prononcimin e tij, deputeti gjerman Nico Semsrott, të cilit i rezultonin të humbur dy laptopë, tha se është i zhgënjyer nga mungesa e përgjigjes nga DG SAFE e Parlamentit Evropian, i cili merret me sigurinë.

“Ky është një skandal i madh dhe nuk e di pse të gjithë po e mbyllin gojën”, i tha ai POLITICO.EU. “Ne jemi shumë të sigurt se ata [hajdutët] kaluan nëpër të gjitha gjërat tona, pasi ambienti dukej i çrregullt,” tha Semsrott, duke shtuar se ai kishte marrë raporte për “midis 40 dhe 100 eurodeputetëve” që zyrat e tyre ishin grabitur.

Semsrott paralajmëroi kolegët në lidhje me vjedhjet në një e-mail grupi të hënën dhe postoi një video në YouTube duke treguar sesi hajdutët hapin me forcë sirtarin e tavolinës, para se të përdornin një paisje për të hapur një dollap që mbante kompjuterët. Semsrott tha se DG SAFE nuk i kishte paralajmëruar eurodeputetët për vjedhjet.

Në mars, Presidenti i Parlamentit, David Sassoli prezantoi masa të rrepta për të ndaluar hyrjen e vizitorëve të jashtëm dhe inkurajoi eurodeputetët dhe stafin që të punojnë nga vendet e tyre të lindjes si një masë paraprake kundër përhapjes së virusit. Parlamenti mbeti kryesisht bosh deri në maj, shkruan Politico.

Një zëdhënës i Parlamentit tha që asambleja ishte informuar për vjedhjet në prill dhe “kishte rritur numrin e agjentëve të sigurimit që patrullojnë zyrat,” ndërsa “agjentët e tjerë kontrolluan hyrjet në ndërtesë.” Ajo shtoi se DG SAFE po heton vjedhjet dhe është në kontakt me autoritetet belge. Zëdhënësi tha se numri i ‘viktimave’ nuk ishte konfirmuar, por zyrtarë të tjerë thanë se numri ishte rreth 50 eurodeputetë.

Dita Cháranzova, një eurodepute Czecheke tha që ajo i kishte kërkuar DG SAFE një raport mbi përparimet dhe do ta ngrinte atë në mbledhjen e ardhshme të byrosë, e cila mbikëqyr çështje administrative.

Massimo Casanova, një deputet nga Lidhja e Italisë, shkroi në faqen e tij në Facebook se ai kishte paraqitur një ankesë në Parlament pasi disa “njerëz të panjohur ” hynë në zyrën e tij. Casanova tha se “asnjë send nuk mungon”, por ai do të hetojë nëse dokumentet do të ishin marrë.

 

© SYRI.net

Lexo edhe:

• Biden thellësisht humbës për çështjet kryesore të inflacionit e imigracionit
• Sulm me thikë në një shkollë në Uells, plagosen dy mësues dhe një nxënës, arrestohet adoleshentja për tentativë vrasjeje
• Tentuan të arratiseshin përmes një tuneli, të burgosurit në Venezuelë u përballën me një surprizë të padëshiruar