Besarta Jashari me fjalë prekëse kujton babain në ditëlindjen e tij

09:28, 19/02/2019

E bija e heroit kombëtar- Hamëz Jashari, Besarta Jashari ka zgjedhur fjalët më të ndieshme për datën e lindjes së babait të saj.

Derisa ka folur për virtytet e tij, ajo ka treguar se djali i saj i vogël mban nofkën e tij “Dyli”.

“Dyli i vogël, që me mburrje mban nofkën tënde qetësisht po më dëgjon, teksa unë po i tregoj për ty. E mua po më mundon një pyetje “çfarë do të bëje për Kosovën, në rrethana aktuale ku po rritet Dyli?”, ka shkruar ajo në llogarinë e saj në Facebok.

Shkrimi i saj i plotë në Facebook:

Si çdo herë, edhe këtë vit po festojmë ditëlindjen tënde babush.

Të tilla raste, po i shfrytëzoj të tregoj për ty babush dhe virtytet tua. Mbahesh mend, si njeri që bashkove njerëz për qëllime të përbashkëta – që sot na bëjnë krenarë.

Dyli i vogël, që me mburrje mban nofkën tënde qetësisht po më dëgjon, teksa unë po i tregoj për ty. E mua po më mundon një pyetje “çfarë do të bëje për Kosovën, në rrethana aktuale ku po rritet Dyli?”.

Jam e vetëdijshme që përgjigjen duhet kërkuar në kujtimet tona, por një gjë jam e sigurtë se tërë jetën ke besuar në popullin tonë, në vlerat tona dhe në të drejtën tonë. Nga ky qëndrim kurrë nuk lëkundemi, këtë ta premtoj babush.