Shtëpia botuese "Onufri" ka ndarë me lexuesit shqiptar lajmin për botimin e vëllimit më të ri poetik, të Akademik Kujtim Shala, të titulluar "Foresteria".
Ky vëllim me titullin e veçantë, që ngjan se i referohet pyllësinë, në fakt, mban emrin e fjetoreve për studentët e huaj, në Itali, ku autori ka kryer studime pasuniversitare.
Me poezi për shenja të jetës e përjetimeve të atyre viteve, të një të huaji që mëton të konturojë kufijtë e kuptimit dhe të ekzistencës në një hapësirë të huaj e të panjohur, hapet cikli i parë i librit titulluar "Foresteria".
Cikli i dytë poetik, titulluar "Arkiv", me anë metaforash spikatëse evokon kujtimet familjare e personale, që kanë në qendër gjyshen e gjyshin, rrënjët e fisit dhe trajtat e tyre të pashlyera njerëzore. Poeti shkruan:
Natyra asht arkivi ma egër i jetës
lidh hijet në dosje të randa
rrëfime të ilustrueme me fytyra mjegulle
miliona vjet shtresue
ankthi ma i madh
tana të vërtetat hije
tym e hije
të humbuna apo të ruajtuna
Gjyshja u beson rranjëve
me jetue me kujtimet e trollit
kur humbin trajtat
mbeten rranjët
arkiv i qenies
Cikli tjetër poetik me emrin AD INFINITUM, ka bërë bashkë poezi dashurie, të cilat shenjohen nga koncepti i dashurisë deri në infinit. Përmes kontrastesh të forta dritë- hije, ngadhënjim- mposhtje, galdimi- pikëllimi, poetizohet relievi bukur i thyer i përjetimit dashuror, me të cilin lidhet kozmogonia e poezisë. Dashuria ndryshon formë, ndërsa finaliteti i saj në pafundësi dhe kujtimet, si gjurmë e pashlyer, jo.
Cikli i fundit poetik, titulluar "Trajtat", ka poezi të një natyre më filozofike, pasi këtu përjetimet poetike nuk janë për sende (si një vëllim i mëhershëm poetik i Kujtim Shalës), por për shenja, fytyra, emrqa shprehi më pak të prekshme, që diku-dikur mjegullohen, për të mbetur trajtë e pashlyer në frymëzim e në vargje:
Fytyra shkrihet ngadalë
pasqyrë e shfytyruar e ujanve
e lisave përmbys e dheut që djeg yjet
qiejt të përzier n’akujt e vejtër kozmikë
në hapësinën pa fillue jeta
fytyra kthen kohën prapa
zhbën hapësinën
qenia zhbëhet në nji pikë të zezë
errsue e dendun në nji grimë
pamja i zhbën tana gjanat
(fragment nga poezia Fytyra).
Vëllimi poetik "Foresteria" është shkruar me një gegërishte të latuar bukur, dhe do ta pasurojë horizontin letrar e estetik të lexuesve. "Foresteria" është e disata vepër poetike e Akademikut Shala dhe është përkthyer tashmë edhe në gjuhën rumune dhe pritet që së shpejti të shohë dritën e botimit edhe në italisht.
Zoti Shala ka një korpus personal të shumë të pasur veprash letrare e studimore me mbi 50 tituj dhe njihet edhe për angazhimin e tij politik në Kosovë, si ish-zëvendëskryeministët dhe ish-ministër kulture, ndërsa aktualisht mban pozicionin e nënkryetarit të Kuvendit.
© SYRI.net