FIFA ka prezantuar një tjetër iniciativë komerciale për Botërorin 2026, duke u dhënë tifozëve mundësinë të shfaqin emrin dhe një mesazh personal në ekranet gjigante të stadiumeve gjatë ndeshjeve të fazës së grupeve.

Programi i quajtur “Super Shoutout” lejon mbështetësit të blejnë një hapësirë të dedikuar në impiantet ku do të zhvillohen 72 ndeshjet e fazës së parë të turneut. Kostoja e këtij shërbimi është 79 dollarë (rreth 68 euro), pa përfshirë taksat.

Fillimisht ishte bërë e ditur se mesazhet do të shfaqeshin gjatë ndeshjeve, por rregullat zyrtare sqarojnë se dedikimet do të transmetohen vetëm para fillimit të lojës, në fazën para ndeshjes.

Sistemi funksionon sipas parimit “first come, first served”, që do të thotë se vendet e para që aplikojnë do të kenë përparësi. Po ashtu, FIFA rezervon të drejtën të refuzojë mesazhe që konsiderohen të papërshtatshme ose që shkelin rregullat e saj.

Kjo nuk është e vetmja iniciativë me pagesë për tifozët. Një tjetër opsion u lejon atyre të vendosin emrin e tyre në tapetin që përdorin lojtarët gjatë daljes nga dhomat e zhveshjes drejt fushës, me një kosto më të lartë prej 160 dollarësh (rreth 138 euro).

Këto iniciativa tregojnë përpjekjen e organizatorëve për të rritur ndërveprimin me tifozët, por gjithashtu kanë ngjallur debat për komercializimin gjithnjë e më të madh të turneut më të rëndësishëm të futbollit botëror.