Humbje zhgënjyese për Ballkanin e Ilir Dajës. Kampionët në fuqi të Kosovës, u mposhtën 0-1 në “Fadil Vokrri” nga irlandezo-veriorët e Larne, në sfidën e parë të vlefshme për raundin e tretë të Ligës së Europës.  

Golin e vetëm të sfidës e shënoi Doneli në minutën e 89-të. Vlen të theksohet fakti se me këtë skuadër Ballkani u përball edhe në sezonin e shkuar, teksa arriti t’iu shënonte plot 7 gola në total, ndërkohë që këtë edicion ekipi nga Suhareka duket se e ka humbur atë shkëlqimin. 

Gjithsesi kualifikimi mbetet ende i hapur dhe Ballkani do të tentojë përmbysjen e madhe në sfidën e kthimit që do të luhet pas 1 jave.