Tirana provoi deri në fund në ndeshjen e dytë gjysmëfinale të kupës së Shqipërisë ndaj Kukësit, por nuk ia dolën të përmbysnin disfatën e ndeshjes së parë 2-0.

Bardheblutë fituan në “Air Albania” me shifrat 1-0, një triumf që nuk mjaftoi teksa në fund ishin verilindorët ata që festuan një biletë për në finale.

Takimi nisi me skenarin perfekt për kryeqytetasit duke qenë se kaluan në avantazh në minutën e 21-të me anë të Deliut.

Po në pjesën e parë, Tirana iu afrua golit të dytë me anë të Patrick që u ndal nga traversa.

Në fund të fraksionit të parë, Kukësi gjeti golin e barazimit me Lamçen, por goli u anulua pas ndërhyrjes së VAR me lojtarin që e kishte prekur topin me dorë.

Në 45-minutëshin e dytë, skuadra e drejtuar nga Erbim Fagu tentoi për të gjetur golin e dytë.

Megjithatë, fillimisht shansin e pati Kukësi me Salamin që u ndal nga traversa. 

Nga ana tjetër, sërish traversa u bë protagoniste me fatin që ishte në anën e verilindorëve pasi traversa i erdhi në ndihmë portierit Tafas pas një goditje në zonë të Patrick.

Deri në fund, rezultati nuk ndryshoi dhe në këtë formë, ekipi i udhëhequr nga trajneri Bledar Devolli ia doli të festonte në “Air Albania” biletën për në finalen e Kupës që zhvillohet po në stadiumin kombëtar më datë 14 maj duke nisur nga ora 19:00.