Boksieri legjendar Mike Tyson, 56 vjeç, është sërish në telashe pasi një grua e akuzoi atë për përdhunim në fillim të viteve 1990 në një padi të ngritur në Nju Jork këtë muaj.

Gruaja kërkon 5 milionë dollarë dëmshpërblim për përdhunim nga ana e Tyson në një limuzinë pasi e takoi atë në një klub nate në Nju Jork, dhe për atë që ajo thotë se ka qenë lëndime fizike, mendore dhe emocionale që ka pësuar në vitet që pasuan.

Deklarata e gruas thotë se përdhunimi ndodhi në fillim të viteve 1990, afërsisht në të njëjtën kohë që Desiree Washington tha se Tyson e përdhunoi atë në Indianapolis.

Si rezultat, Tyson u dënua për përdhunim më 10 shkurt 1992 dhe kreu tre vjet burg.

Në dëshminë e saj në rastin aktual, gruaja ka deklaruar se ka hipur në limuzinën e Tyson dhe se boksieri ka filluar menjëherë ta prekë dhe ta puthë.

"Unë i thashë jo disa herë dhe i kërkova të ndalonte, por ai vazhdoi të më sulmonte. Më pas më hoqi pantallonat dhe më dhunoi", tha gruaja, e cila dëshiron të mbetet anonime.

Avokati që përfaqësonte gruan tha se zyra e tij nuk e pranoi fjalën e gruas, por hetoi pretendimet e saj dhe përcaktoi se provat ishin shumë të besueshme.

Ky rast është vetëm një konfirmim i ri i jetës së turbullt të Tyson jashtë ringut në të cilin ai ishte kampioni i padiskutueshëm i peshave të rënda të botës nga viti 1987 deri në 1990.