Tottenham “ngeci” në një barazim 1-1 ndaj Sportingut të Lisbonës mbrëmjen e së mërkurës në Champions League teksa të besuarit e trajnerit Antonio Conte panë t’i anulohej një gol në minutën e 95-të për një pozicion jashtë loje milimitrik të Harry Kane. VAR ndërhyri dhe anuloi golin e festën e anglezëve ndërsa trajneri Antonio Conte reagoi ashpër dhe përfundoi duke u ndëshkuar me karton të kuq nga arbitri kryesor, Makkelie.

Ndërkohë, në konferencën pas ndeshjes, tekniku italian i Spurs-ave vijoi të ishte tejet i nervozuar ndërsa akuzoi sistemin VAR si të pandershëm teksa shtoi se arbitri holandez e përjashtoi vetëm sepse ai ishte personi më i famshëm që po protestonte në atë moment.

“VAR na ka shkaktuar një dëm të madh, kur shpiken ndërhyrje të këtij lloji është për të ardhur keq. Kemi pësuar një padrejtësi të madhe, në një stadium tjetër dhe me skuadra të tjera, të jeni të sigurt se nuk do të kishte ndodhur. Vendimet arbitrare pranohen edhe kur janë kundër, por kur janë të pandershme unë tërbohem.

Përjashtimi? Pas anulimit të golit nga VAR, kishte shumë persona në fushë, por arbitri më përjashtoi mua si më të famshmin. Më vjen keq sepse mund ta kishim mbyllur çështjen e kualifikimit, por e kemi fatin në duart tona. Me sinqeritet them se nuk luajtëm mirë dhe se Sportingu na vendosi në vështirësi”, u shpreh Conte.