FIFA nuk fal kur bëhet fjalë për dopingun. Në faqen e saj zyrtare, organi qeverisës i futbollit botëror tha se kishte pezulluar për katër vite dy lojtarë të cilët rezultuan pozitiv me doping. Ngjarjet në fjalë kanë ndodhur gjatë ndeshjeve kualifikuese për Kupën e Botës 2022 në Katar.

“Komiteti Disiplinor i FIFA-s ka vendosur pezullimin për një periudhë katërvjeçare për dy lojtarët e mëposhtëm për shkak të shkeljeve të dopingut gjatë ndeshjeve kualifikuese për Kupën e Botës FIFA Katar 2022: Erick Alejandro Rivera (El Salvador), rezultoi pozitiv me Clostebol pas një ndeshjeje të luajtur më 8 shtator 2021; Sabri Ali Mohamed (Xhibuti), doli pozitiv për testosteron ekzogjen pas një ndeshje të luajtur më 12 nëntor 2021. Për shkak të pranisë së substancave të ndaluara të lartpërmendura (këto dy substanca klasifikohen si një substancë e paspecifikuar "S1.1 Anabolic Androgenic Steroid" në Lista e Ndaluar 2021 - Standardi Ndërkombëtar i Kodit Botëror Anti-Doping) në mostrat e dhëna nga dy lojtarët, këta të fundit janë fajtorë për shkelje të nenit 6 të Rregullores Anti-Doping të FIFA-s dhe nenit 17 të Kodit Disiplinor të FIFA-s. Rivera dhe Ali Mohamed janë pezulluar përkatësisht deri më 5 tetor 2025 dhe 11 korrik 2026. Në përputhje me nenin 30 të Rregullores Anti-Doping të FIFA-s, këto pezullime zbatohen veçanërisht për të gjitha ndeshjet kombëtare dhe ndërkombëtare, miqësore apo zyrtare,” thuhet në deklaratë.