Thierry Henry ka kërkuar nga të gjithë që të kenë durim për Lionel Messin dhe të presin rigjetjen e formës së tij te Paris Saint-Germaini.

Ish-bashkëlojtari i argjentinasit ka thënë se 34-vjeçari u largua nga Barcelona duke qarë dhe përjetoi një shok emocional para fillimit të aventurës së re në kryeqytetin francez.

“Duhet ta pyesni atë, nuk mund të flas në emër të tij. Por, kur flasim për Messin ose Neymarin, të cilët janë lojtarë të jashtëzakonshëm, shumë shpesh e harrojmë atë aspekt (mendor).

Kur Lionel qau për largimin nga Barcelona, nuk ishte pjesë e planit. Kur mendon se asnjëherë nuk do të largohesh nga një vend dhe përnjëherë largohesh, të shkakton shok emocional. Njerëzit thonë: ‘Ai është mirë, ka gjithçka që i nevojitet në Paris’, por nuk është aq e thjeshtë.

Messi nuk ka folur asnjëherë publikisht në lidhje me problemet eventuale në Paris, por legjenda e Arsenalit beson se sportistët duhet t’i rrëfejnë çështjet e tyre, në mënyrë që t’i tejkalojnë më lehtë.