Nedim Bajrami dëgjoi zemrën në momentin që duhet të zgjidhte mes kombëtares së Zvicrës dhe asaj të Shqipërisë.

Mesfushori në pronësi të Juventusit, i cili prej dy vitesh është i huazuar tek Empoli, ka zgjedhur që të luajë me kombëtaren kuqezi, pasi ka qenë pjesë e helvtëve në ekipet e moshave.

Bajrami do të jetë i grumbulluar me Shqipërinë për edicionin e kualifikueseve të Botërorit “Katar 2022”.

Ndërkohë së fundmi në një intervistë të dhënë për Koha.net, fantazisti 22-vjeçar, tregoi për vendimin e parë, duke zbuluar prapaskenat.

“Unë kam luajtur në të gjitha grupmoshat për Zvicrën dhe ishte momenti të vendosja se nëse do të shkoja të luaja për Zvicrën U-21 në Evropian apo për ekipin e parë të Shqipërisë. Kam biseduar me menaxherin Erdin Shaqiri (vëllai i Xherdan Shaqirit, i cili pati një rol të madh në vendimin e Bajramit), familjen time dhe në fund e mora vendimin vetë.

E kam dëgjuar zemrën. E ndjeva veten më shumë që të luaja për Shqipërinë dhe në fund e kam marrë këtë vendim. Jam shumë i lumtur që kam zgjedhur të luaj për Shqipërinë. Kemi biseduar me trajnerin e Zvicrës U-21, por më shumë e kam ndarë mendjen, e kam dëgjuar zemrën dhe u thashë për Shqipërinë. Edhe po të vinte Zvicra A, unë isha i vendosur të luaja për Shqipërinë.

Kam pasur kohë dhe jam menduar, por besoj se kam bërë zgjedhjen më të mirë që kam shkuar te Shqipëria, sepse në fund të fundit e ndiej veten shqiptar. Kam bërë hapin e duhur dhe është hap i madh për mua. Jam i ri dhe jam krenar që do ta kem mundësinë të luaj për Shqipërinë. Niveli i Shqipërisë është rritur.

Ka mundësi që të luaj për Shqipërinë këtë muaj. Kam biseduar edhe me Amir Abrashin dhe Arlind Ajetin, me të cilët kam luajtur dhe i njoh goxha mirë edhe nga afër. Më ka mbetur vetëm pasaporta. Unë jam gati të luaj për Shqipërinë”, tha Bajrami.