Rikthimi i Radja Nainggolan te Interi pas huazimit 1-vjeçar te Cagliari ka rezultuar një dështim i vërtetë. Deri tani mesfushori belg nuk ka nisur asnjë ndeshje si titullar te skuadra e Contes madje është aktivizuar si zëvendësues në shumë pak ndeshje, kjo për shkak edhe të problemeve që ka patur belgu me COVID-19 dhe dëmtimet.

Në janar sipas të gjitha gjasave, Nainggolan do të largohet nga Interi. Sipas raportimit të “Calciomercato”, 32-vjeçari mund të rikthehet te Cagliari. Inter pritet ta lërë të lirë mesfushorin në merkaton e janarit, teksa kjo është dhe dëshira e Radjas. Problemi mbetet tek oferta e ishullorëve, të cilët duan ta transferojnë falas ish-lojtarin e tyre.

 Ndërkohë dhe paga e lartë e Nainggolan është një problem për Cagliarin, por ata mund të bëjnë një sakrificë për të. Ndoshta në janar zikaltrit mund të ndryshojnë mendim dhe ta lënë të lirë, pasi ata vetë po monitorojnë disa lojtarë dhe në këtë mënyrë do të shpëtonin nga paga e lartë e belgut.