Manchester City nuk po arrin dot t’i bëjë dy fitore radhazi në kampionat, pasi mesditën e sotme nuk ka shkuar më shumë se një barazim 1-1 në transfertën londineze ndaj West Ham.

Të besuarit e Pep Guardiolës u ndëshkuan që në minutën e 18’, kur sulmuesi 30-vjeçar anglez Michail Antonio shënoi një gol spektakolar me roveshiatë, pas një krosimi pa shumë pretendime në zonë.

Reagimi i “citizens” ishte mjaft i mirë dhe pas një shpërthimi të Joao Cancelos në krah, ishte Phil Foden që dërgoi topin në rrjetë duke rikthyer baraspeshën në minutën e 51-të, por më pas rezultati mbeti i pandryshuar deri në vërshëllimën finale.

Me këtë barazim të dy skuadrat mbeten në kuotën e 8 pikëve, pasi numërojnë nga dy fitore, dy barazime dhe një humbje në 5 ndeshjet e zhvilluara deri tani në kampionatin anglez.