Elesid Hysaj premtoi para sfidës me Islandën, se do të zhvillonte një ndeshje që kurrë nuk e kishim parë. Në të vërtetë kështu rezultoi, mbrojtësi shkodran bëri një ndeshje brilante duke i mbyllur gojën të gjithë skeptikëve.
Por kjo ndeshje e pati dhe një pasojë, pasi dëmtimi në këmbë duket se do ta penalizojë në vazhdimësinë e tij në klub. Edhe pse mendohej se nuk kishte diçka serioze, Hysaj e ka pasur të pamundur të bëhej gati për sfidën e kësaj jave në kampionat të Napolit ndaj Sampdorias.
Stafi mjekësor e kishte nën vëmendje në këto dy ditë, duke parë vijimësinë e tij dhe duke e mbajtur në mbikëqyrje në stërvitjen individuale të cilës i është nënshtruar.
Por në fund, është vendosur që mbrojtësi të mos rrezikojë. Kështu, trajneri Carlo Ançeloti nuk e ka përfshirë në listën zyrtare të lojtarëve për takimin që luhet të shtunën në orën 18:00.
Tekniku ka vendosur që të mos rrezikojë, sidomos duke pasur parasysh faktin se në mesjavë e pret një tjetër sfidë shumë më e komplikuar, ndaj Liverpulit në Champions. Kontributi i Hysajt ndaj një ekipi që prodhon lojë shumë ofensive, mund të jetë i nevojshëm, gjithmonë nëse mbrojtësi kuqezi do të riaftësohet deri atëherë dhe të jetë në 100%.
© SYRI.net
Bëje LIKE dhe merr lajmin e fundit nga Sporti: