Në 15 korrik, rregullorja e re e FIFA që ndryshon përgjithmonë futbollin shqiptar

Në 15 korrik, rregullorja e re e FIFA që ndryshon përgjithmonë futbollin shqiptar

09:22, 12/07/2019

Miratimi i një rregulloreje të re sportive nga FIFA që hyn në fuqi më datë 15 korrik, do të ndryshojë përgjithmonë futbollin shqiptar, duke rregulluar më në fund problemin e borxheve të prapambetura, Duke parë se federatat bënin pak punë për të zgjidhur problemet që klubet e tyre kishin me pagesat ndaj lojtarëve apo trajnerëve, FIFA ka gjetur zgjidhjen ideale duke ndryshuar Kodin e Disiplinës Sportive.

Edicioni i ri i kësaj rregulloreje, që hyn në fuqi më 15 korrik, ka bërë të thjeshtë çdo gjë në këtë aspekt dhe detyron klubet të mos zvarrisin përjetësisht pagesat. Kjo ndodh rregullisht në Shqipëri ku lojtarë apo trajnerë të veçantë nuk janë paguar për vite më radhë pavarësisht urdhrave që kanë dalë nga FSHF apo bllokimet e llogarive nga zyrat e Përmbarimit.

Në rregulloren e re të FIFA-s parashikohet që këtyre klubeve t’u lihet afat 30 ditë për të bërë pagesën, përndryshe do të hyjë ën fuqi masa e parë, ajo e bllokimit të merkatos së futbollistëve derisa ta bënin një gjë të tillë, Nëse në një afat të dytë të caktuar nuk respektohej kjo kërkesë e ndërkombëtarëve, për klubet parashikohet heqja e pikëve dhe rënia nga kategoria, që u komunikohet federatave përkatëse.

Me pak fjalë, lojtarët e klubeve si Flamurtari apo Luftëtari që kanë disa muaj pa u paguar, mund të drejtohen që nga data 15 korrik në FIFA dhe të gjejnë atje zgjidhjen e problemeve të tyre, pasi me rregulloren e re të miratuar, klubet nuk do të mund të evitojnë më pagesat e prapambetura ndaj tyre pasi përndryshe rrezikojnë seriozisht të shkrihen.

 

© SYRI.net

Lexo edhe:

Bëje LIKE dhe merr lajmin e fundit nga Sporti:

Komentet

Shto koment

Denonco