Eden Hazard mund të bëhet “galaktiku” i radhës i Real Madridit.

“Los Blancos” janë të gatshëm të hidhen në treg për një tjetër transferim të madh në botën e futbollit.

Sipas “Okdiario”, Real Madridi po planifikon të hidhet në sulm për yllin e Chelseat, Eden Hazard, të cilin dëshiron ta transferojë në merkaton e janarit.

Për të bindur Chelsean, Real Madridi dëshiron që në drejtim të kundërt të nisë yllin uellasian, Gareth Bale, i cili edhe në të kaluarën ka qenë pjesë e Premierligës, ku ka veshur fanellën e Tottenham Hotspur.

Drejtuesit e Real Madridit e shohin Hazardin si lojtarin ideal për të ringjallur sezonin e keq të tyre, që solli deri në shkarkimin e trajnerit Julen Lopetegui.

Në anën tjetër, në kampin madrilen shohin se ka ardhur fundi i kohës së Bale te Real Madridi, që këtë sezon ka shënuar vetëm tri gola në 11 paraqitje.