FOTO/ Kamëz, punimet e sheshit drejt fundit, Mziu: Investim 100% i bashkisë

FOTO/ Kamëz, punimet e sheshit drejt fundit, Mziu: Investim 100% i bashkisë

10:06, 19/12/2018

Kamza ndryshon çdo ditë. Qyteti është kthyer në një kantier ndërtimi ku punohet çdo ditë për të ndryshuar rrënjësisht infrastrukturën e qytetit. Veç punimeve që po kryhen në mbi 70 rrugë në territorin e Bashkisë, një nga investimet më të rëndësishme është dhe ndërtimi i pedonales dhe sheshit të ri të qytetit Kamëz.

Punimet kanë ecur në kohë rekord dhe janë inspektuar në mënyrë sistematike nga kryetari i Bashkisë Kamëz, z. Xhelal Mziu, i cili ka kërkuar jo vetëm të zbatohet afati i realizimit të punimeve, por ka parë nga afër dhe ecurinë e tyre duke kërkuar realizimin sa më mirë të projektit.

Kryetari i Bashkisë, Xhelal Mziu, thotë: “Ky është një investim 100% i Bashkisë Kamëz për qytetarët e saj dhe tregues që çdo taksë e tyre kthehet në investim. Është ky një projekt i financuar nga financat e Bashkisë, duke qenë se qeveria “Rama” nuk e konsideron Kamzën, nuk e mbështet me financim projektesh ku janë jo pak, por mbi 140 projekte flenë në sirtarët e ministrive të qeverisë së Rilindjes”.

Pedonalja e qytetit, me sipërfaqe 4936 metra katrorë, është një investim i rëndësishëm i Bashkisë Kamëz dhe një infrastrukturë shërbyese për qytetarët e saj. Investimi përfshin segmentin përgjatë Bulevardit Blu në të dyja anët e tij, me gjerësi 5 m dhe 8 m.

Ka një shtrirje nga qendra e qytetit drejt kryqëzimit me rrugën “Londër”. Realizimi i këtij investimi është një vepër që ka një impakt të ndjeshëm për të gjithë qytetarët e Kamzës, jo vetëm kaq, por edhe të gjithë atyre që vërtet gjatë këtyre viteve kanë qenë të interesuar për jetën e këtij qyteti.

Panorama e qendrës së qytetit është ndryshe, tashmë edhe me ndriçimin e saj dhe të gjithë Bulevardit Blu, duke krijuar një pamje të vërtetë të një qyteti evropian së bashku me qendrën e qytetit.

 

© SYRI.net

Lexo edhe:

Komentet

Shto koment

Denonco