Lajmi i fundit

LIVE/ Sot Samiti Ballkan Perëndimor - BE në Tiranë

Shëndeti mendor: Epidemia moderne që shkurton fillin e jetës

Shëndeti mendor: Epidemia moderne që shkurton fillin e jetës

09:39, 01/12/2023
A+ Aa A-

Prania e njerëzve të tjerë në jetën tonë dhe kontaktet shoqërore rezulton të jetë shumë më e rëndësishme për shëndetin dhe mirëqenien tonë nga sa e dinim.

Në një botë të dominuar nga rrjetet sociale dhe platformat e komunikimit, të cilat kanë rritur kontaktin mes individëve në të gjitha mënyrat e mundshme, njerëzit duket se ndihen më të vetmuar se kurrë. Ndoshta kjo është arsyeja pse epidemia moderne e vetmisë dhe izolimit social shihet si më e rrezikshme për shëndetin se kurrë më parë. Teknologjia moderne lehtëson kontaktin, por ky kontakt shpesh mbetet sipërfaqësor, formal, nuk thellohet dhe shpeshherë nuk arrin të bëhet thelbësor. Ky fenomen përforcon izolimin social dhe ndjenjën e vetmisë , duke shkaktuar efekte shumë më serioze nga sa mendonim deri tani, argumentojnë ekspertët.

Një rishikim i kohëve të fundit i botuar në Nature Human Behavior zbuloi se njerëzit që ndihen të vetmuar ose të përjashtuar nga shoqëria përballen me një rrezik në rritje të vdekjes së hershme nga të gjitha shkaqet. Sipas studiuesve nga Universiteti Mjekësor Harbin i Kinës, ka disa teori që ndoshta shpjegojnë këtë lidhje.

Për shembull, njerëzit e vetmuar kanë më shumë gjasa të mos ushtrojnë, të mos hanë mirë dhe të mos kërkojnë ndihmë kur kanë nevojë për diçka. Në të njëjtën kohë, ata janë më të prirur ndaj zakoneve jo të shëndetshme, si pirja e duhanit dhe alkoolit. Hulumtimet e mëparshme kanë lidhur gjithashtu izolimin social me inflamacionin dhe një sistem të dobët imunitar.

Për studimin, ekipi hulumtues vazhdoi me rishikimin e 90 studimeve, të cilat përfshinin një total prej më shumë se 2.2 milionë njerëz nga e gjithë bota. Rezultatet e rishikimit treguan se njerëzit që ndiheshin të vetmuar ose përjetonin izolim social përballeshin me një rrezik më të lartë të vdekjes nga çdo shkak, përfshirë kancerin. Për më tepër, izolimi social u shoqërua me një rrezik të shtuar të vdekjes nga sëmundjet e zemrës.

Studiuesit sqaruan se izolimi social dhe vetmia nuk janë të njëjta. Izolimi social barazohet me mungesën e komunikimit me njerëzit e tjerë, ndryshe nga vetmia, e cila reflekton se si ndihet, pavarësisht se sa socializohet me të tjerët.

“Rishikimi zbuloi se si izolimi social ashtu edhe vetmia janë parashikues të rëndësishëm të vdekjes ,” komentoi Julianne Holt-Lunstad, drejtoreshë e Laboratorit të Integrimit Social dhe Shëndetit të Universitetit Brigham Young. Megjithatë , të dyja jo gjithmonë përkojnë. Është e mundur që një person të ndihet i vetmuar pa qenë i izoluar shoqërisht dhe anasjelltas. Në këtë studim, efektet e izolimit social dukeshin më të forta mes të dyjave ”, theksoi ai.

Ajo shtoi se strategjitë e shëndetit publik duhet të fokusohen më shumë në luftimin e këtyre dy faktorëve. ” Rezultatet e rishikimit janë të qarta: Izolimi rrit rrezikun e vdekjes së parakohshme ,” thekson Dr. Holt-Lunstad.

Sipas Robin Yabroff, shkencëtar kryesor kërkimor për Shërbimet Shëndetësore të Shoqatës Amerikane të Kancerit, ka shumë që mund të bëhet për të luftuar vetminë dhe izolimin social dhe për të përmirësuar shëndetin publik. Pjesëmarrja në grupe sociale dhe komunitare, me synimin për të rritur ndjenjën e përkatësisë, kërkimi i ndihmës në kohë të vështira dhe reduktimi i praktikave që çojnë në ndjenjat e shkëputjes, si përdorimi i tepruar i mediave sociale, janë vetëm disa nga këto.

© SYRI.net

Lexo edhe:

Komentet

Shto koment

Denonco