Hetimet për korrupsion në aksidentin e stacionit hekurudhor në Serbi marrin tjetër rrjedhë

Për muaj të tërë, masat në Serbi kanë dalë në rrugë për të protestuar kundër qeverisë së Presidentit autokratik, Aleksandar Vuçiç.

Shkaku ishte shembja e tendës së stacionit të trenit të rinovuar rishtazi në Novi Sad më 1 nëntor 2024, e cila mori jetën e 16 personave. Ekspertë të pavarur dhe figura të opozitës, fajësojnë për katastrofën pakujdesinë dhe korrupsionin e autoriteteve. Tani, hetimi për katastrofën e Novi Sadit është ndërprerë.

Njëmbëdhjetë arrestime deri më tani

Siç raporton revista javore Radar, Drejtori i Policisë Dragan Vasiljević informoi Zyrën e Prokurorit Special për Krimin e Organizuar një javë më pare, se nuk do të lejonte më 17 oficerë policie të merrnin pjesë në task-forcën, që më parë kishte hetuar korrupsionin e dyshuar gjatë rinovimit të stacionit të trenit.

Task-forca arrestoi njëmbëdhjetë persona më 1 gusht, përfshirë dy ish-ministra të infrastrukturës dhe ndërtimit, Tomislav Momirović dhe Goran Vesić. Ata dyshohet se kanë kryer makinacione financiare me vlerë totale 115 milionë dollarë (98.2 milionë euro). Momirović dhe Vesić janë nën arrest shtëpiak.

Fatkeqësia e Novi Sadit ka shkaktuar një krizë të thellë politike në Serbi. Për muaj të tërë, demonstruesit kanë kërkuar zgjedhje të parakohshme parlamentare. Presidenti Vuçiç e refuzon këtë. Kohët e fundit, policia ka marrë masa gjithnjë e më të ashpra ndaj kundërshtarëve të regjimit. Në fillim të vitit të ri shkollor, disa drejtorë shkollash dhe mësues që mbështetën demonstruesit u pushuan së fundmi nga shërbimi publik./ Der Standard.