I frikësuar nga protestat masive dhe pa praninë e madiave apo qytetarëve, Vuçiç përuron fshehurazi një autostradë

Presidenti i Serbisë, Aleksandar Vuçiç, ka përuruar sot në mënyrë të fshehtë një segment të rëndësishëm të autostradës “Milosh i Madh”, që lidh Prelinën me Pozhegën, pa praninë e mediave apo njoftime paraprake për publikun.

Ceremonia u zhvillua në heshtje, një qasje e pazakontë për një projekt të kësaj rëndësie infrastrukturore, duke ngritur pikëpyetje mbi motivet pas këtij vendimi.

Sipas medias serbe nova.rs, autoritetet shtetërore kanë ndjekur një qasje diskrete për këtë përurim, duke shmangur vëmendjen mediatike në një moment kur klima politike në vend është e tensionuar. Zyrtarë të qeverisë e kanë quajtur hapin si një “zhvillim të rëndësishëm” për përparimin e projekteve publike, por nuk kanë ofruar detaje mbi planin e plotë të funksionimit të kësaj pjese të autostradës.

Segmenti i ri është pjesë e projektit strategjik të autostradës “Milosh i Madh”, e cila përfshin tunele dhe struktura komplekse, duke synuar të përmirësojë ndjeshëm lidhjen midis Beogradit dhe zonave perëndimore të Serbisë.

Megjithatë, përurimi i kryer larg syve të publikut vjen në një kohë kur Serbia po përballet me protesta masive kundër qeverisë dhe presidentit Vuçiç. Qytetarët kanë dalë në rrugë për të protestuar kundër korrupsionit, mungesës së llogaridhënies dhe kontrollit të medias, duke e vendosur udhëheqjen nën presion të shtuar.

Sipas analistëve, shmangia e transparencës dhe e kontaktit me publikun në këtë rast mund të jetë një strategji për të distancuar imazhin e presidentit nga pakënaqësia në rritje dhe për të shmangur çdo incident që mund të nxiste edhe më shumë tensionin politik në vend.