Ministria e Jashtme e Shqipërisë njoftoi se deri tani, nuk ka shqiptarë të vrarë nga përplasja e trenave në Greqi, por vetëm 5 persona të plagosur që janë jashtë rrezikut për jetën. 

Në njoftimin zyrtar thuhet:

"Bazuar në komunikimin e fundit që ambasada dhe konsullata shqiptare në Greqi kanë patur me autoritetet greke, deri më tani nuk ka informacion për shtetas shqiptarë në rradhët e viktimave të aksidentit hekurudhor. Po vijohet me identifikimin e tyre. Pesë persona me nënshtetësi shqiptare rezultojnë të plagosur, jashtë rrezikut për jetën e po trajtohen në kushte spitalore."

Mbi 40 persona raportohet se kanë humbur jetën dhe mbi 80 janë plagosur në një aksident treni jashtë qytetit të Larisës në Greqi të martën mbrëma. Sipas raportimeve, aksidenti u shkaktua kur një tren pasagjerësh u përplas me një tren mallrash jashtë Larisës dhe më pas doli nga shinat. Aksidenti ka ndodhur pak pas orës 23:00, në Evangelismos, pranë Tempit. Treni kryente linjën Selanik-Larisa dhe ishte nisur në orën 19:22.

Aksidenti më i rëndë i trenit në historinë e Greqisë

Përballë aksidentit më të rëndë hekurudhor të hekurudhave greke janë ekipet e shpëtimit që po bëjnë ende përpjekje të mëdha për të nxjerrë njerëzit nga rrënojat e trenave. 

Në vendin e aksidentit, dy vinça të mëdhenj po ngrenë pjesë të makinave të pasagjerëve që janë shtypur nga përplasja e frikshme dhe janë kthyer në një masë hekuri pa formë.

Forcat speciale të EKAM-it me mjete prerëse dhe me bombola oksigjeni vazhdojnë të presin llamarina nga vagonët e parë në kërkim të njerëzve.