Të hënën, mbi 240 migrantë në një kamp të ri në ishullin grek të Lesbos, janë infektuar me COVID-19.

Agjencia e Shëndetit Publik në Greqi raportoi se rezultatet dolën pas testimit të rreth 7.000 personave.

Më 8 shtator, një zjarr që shpërtheu në kampin Moria të ishullit Lesbos, detyroi 12.000 migrantë të largohen prej aty, derisa autoritetet ndërtuan me shpejtësi një kamp të ri të përkohshëm. Gjashtë të rinj afganë përballen me akuza për zjarrvënie.

U desh më shumë se një javë që shumica e azilkërkuesve të ri-strehohen në kampin e ri.

Që nga marsi, kufizimet e lëvizjes në kampin Moria ishin edhe më të rrepta për shkak të pandemisë së virusit koronavirus. Ministri i Migracionit në Greqi, Notis Mitarachi, të hënën i tha parlamentit se ata që janë përgjegjës për zjarrin “do të vuajnë dënimin e tyre në Greqi dhe më pas do të dëbohen”.

Disa azilkërkues tani janë ankuar se në kampin e ri nuk kanë kushte themelore për banim.

Mitarachi tha se një kamp i ri “modern dhe i sigurt” do të ndërtohet në Lesbos – edhe pse zyrtarët lokalë e kundërshtojnë me forcë këtë veprim, duke kërkuar largimin e menjëhershëm të shumicës së azilkërkuesve.