Busti i Presidentit të njëzet e tetë amerikan, Woodrow Wilson prej të enjtes, qëndron para komunës së Çairit në Shkup, me rastin e binjakëzimit të saj me qytetin Staunton të Virxhinias, që është vendlindja e presidentit Wilson.
Në ceremoni ishin te pranishëm prefektja e Stauntonit dhe zyrtarë, veprimtarë e politikanë nga Maqedonia e Veriut, nga Shqipëria dhe Kosova.
Carolyn Dull, prefekte e qytetit të Stauntonit tha se i shikon njerëzit e Çairit si fqinjët e saj.
“Dhe siç veprojnë fqinjët e mirë, qyteti i Stantonit do të shfaq mirësi, miqësi dhe do të ndajë vullnetin e mirë”, tha ajo.
Asambleja e qytetit të Stantonit muajin e kaluar ka miratuar një rezolutë për bashkëpunim me komunën e Çairit, ku ndërmjet tjerash theksohet bashkëpunimi i ndërsjellë dhe promovimi i lidhjeve në fushën e kulturës, në atë sociale dhe ekonomike midis komuniteteve të Stantonit dhe Çairit përmes shkëmbimeve të ndryshme.
Visar Ganiu, kryetar i komunës së Çairit në Shkup foli për ngritjen e bashkëpunimit midis Çairit dhe Stantonit përmes formave institucionale, teksa nënvizoi respektin që i kushtohet presidentit Woodrow Wilson dhe popullit amerikan në përgjithësi.
Zonja Dull dhe zoti Ganiu shkëmbyen dhurata, përkatësisht çelësat e komunave të tyre si simbolikë e afërsisë dhe binjakëzimit.
Kryetari i Parlamentit të Maqedonisë së Veriut Talat Xhaferi theksoi mirënjohjet ndaj Shteteve të Bashkuara për ndihmën dhe mbështetjen e vazhdueshme ndaj Maqedonisë së Veriut dhe gjithë rajonit të Ballkanit Perëndimor:
Zyrtarja e Ambasadës amerikane në Shkup, Shanon Ranian citoi fjalët e presidentit Woodrow Wilson që thotë: “Kur bota është më e sigurt për demokraci – kjo garanton një të ardhme më të qëndrueshme dhe mirëqenie për të gjithë”.
“Stantoni dhe Shkupi, vendlindjet e Presidentit Wilson dhe të Nënës Terezë janë qytete që i dhanë botës nga një fitues të çmimit Nobel”, tha zonja Ranian duke shpresuar se lidhja midis dy qyteteve do të vazhdojë gjatë.
Nismëtar për vendosjen e bustit ka qenë kryetari i BDI-së Ali Ahmeti:
Komuna e Çairit e banuar me shumicë shqiptare në kryeqytetin e Maqedonisë së Veriut mbase mund të jetë e vetmja që i ka bërë vend një figure historike amerikane siç është Presidenti Wilson, i cili njihet për angazhimet kundrejt mundësisë së vetëpërcaktimit dhe vetëqeverisjes së popujve të Evropës, në veçanti atyre më të vegjël e të pafuqishëm.
© SYRI.net