FOTO/ Ambasadorja e re e SHBA merr detyrën

FOTO/ Ambasadorja e re e SHBA merr detyrën

10:34, 13/07/2019
A+ Aa A-

Ambasadorja e re amerikane Kate Marie Byrnes, e cila para pak ditësh arriti në Shkup, sot i dorëzoi letrat kredenciale presidentit Stevo Pendarovski.

Ambasadorja Byrnes theksoi zotimin për të promovuar qëndrueshmërinë përmes institucioneve të fuqishme dhe mbështetjes së përpjekjeve të autoriteteve maqedonase në luftën kundër korrupsionit dhe në forcimin e sundimit të ligjit e të sigurisë.

‘Kam kënaqësinë që e filloj mandatin tim në këtë periudhë kyçe të marrëdhënieve midis dy vendeve tona. Me padurim pres fundin e vitit që t’i dëshirojmë Maqedonisë së Veriut mirëseardhje si anëtarja e tridhjetë e NATO-s’ – tha zonja Byrnes.

Ambasadorja amerikane shtoi se ‘për më tepër se 25 vjet kemi punuar së bashku dhe se kemi arritur shumë në synimet tona për ta parë Maqedoninë e Veriut të integruar plotësisht në institucionet perëndimore dhe të përkushtuar tërësisht ndaj vlerave të përbashkëta demokratike, lirisë individuale dhe sundimit të ligjit’.

Image

Ajo nënvizoi më tej se do të përpiqet që përmes kulturës amerikane të ndërtojë ura të reja lidhëse ndërmjet qytetarëve të dy shteteve.

Ambasadorja Byrnes është diplomate karriere. Ajo ka shërbyer si zëvendës-ambasadore në Athinë, si përfaqësuese e përhershme në OSBE në Vjenë dhe nëpër misione të tjera.

Zonja Byrnes pason ambasadorin Jess Baily, i cili u largua nga Shkupi qysh në muajin mars, pasi i përfundoi mandati.

Presidenti Pendarovski shprehu kënaqësinë me emërimin për ambasadore të zonjës Byrnes ‘si njohëse e mirë e rrethanave në Ballkan dhe vendit tonë’, siç u shpreh. Ai shprehu falënderime për mbështetjen e vazhdueshme dhe të fuqishme të SHBA-së që nga pavarësia e Maqedonisë së Veriut e këndej, duke theksuar se ‘me këtë po realizohen aspiratat tona euroatlantike, si përparësi dhe përcaktim politik e strategjik i vendit’. /VOA

© SYRI.net

Lexo edhe:

Komentet

Shto koment

Denonco