Kushtetuesja vijon në ndihmë të Ramës, shtyn vendimin për Ballukun për të djegur afatet

Gjykata Kushtetuese ka vijuar edhe sot t’i dalë në ndihmë kryeministrit Edi Rama në lidhje me ankimin e këtij të fundit, për të kundërshtuar kërkesën e SPAK mbi pezullimin e Zëvendëskryeministres Belinda Balluku nga detyra, pasi është në hetim për abuzimin dhe prishjen e garës në tenderat publikë, me një vlerë qindra milionë euro, si afera e tunelit të Llogarasë dhe lotet e Unazës së Madhe në Tiranë.

Duke mos arritur të marrë një vendim për ankimin e Ramës në lidhje me çështjen e Belinda Ballukut, Kushtetuesja e ka shtyrë për herë të dytë shqyrtimin e saj, duke konfirmuar skenarin e denoncuar nga opozita, se me vonesat e saj në vendimarrje, kërkon të djegë afatin 3 mujor të shqyrtimit të mandatit të ministres në Kuvendin e Shqipërisë, pas kërkesës së SPAK për shtrëngimin e masës së sigurisë në ‘arrest shtëpie’.

Kujtojmë se në Kushtetuese është kërkesa e SPAK për pezullimin nga detyra të Belinda Ballukut dhe në Kuvend është kërkesa e Prokurorisë së Posaçme për heqjen e imunitetit dhe arrestimin e saj, proces i cili po mbahet peng nga Grupi Parlamentar i PS-së, duke mos e shqyrtuar kërkesën e organit special të akuzës brenda afateve ligjore dhe si rrjedhojë, nqs kalojnë 3 muaj pa një vendim, digjen afatet për kërkesën e SPAK për të arrestuar Zëvendëskryeministren e marrë nën hetim penal.

Mbledhja në dhomë këshillimi, e zhvilluar këtë të martë, nuk prodhoi një vendimmarrje përfundimtare, duke e lënë çështjen të hapur për një seancë tjetër.

Sipas afateve ligjore, Gjykata Kushtetuese ka 30 ditë kohë për të marrë një vendim përfundimtar, afat i cili skadon më 22 shkurt.