SYRI TV/ Rama, reagim skandaloz për protestën, justifikon dhunën e policisë, fyen opozitën dhe qytetarët

Kryeministri Edi Rama ka justifikuar dhunën brutale të policisë ndaj protestuesve të opozitës. Në një reagim skandaloz, ai ka fyer opozitën dhe qytetarët protestues duke dëshmuar se është frymëzuesi i sjelljes brutale të policisë ndaj qytetarëve. Rama nuk tha asnjë fjalë për hedhjet masive të gazit lotsjellës në kundërshtim me cdo protokoll apo shoqërimin e dhunshëm të fëmijëve në komisariate.

Syri tv

Kryeministri Edi Rama ka bërë një reagim skandaloz pas protestës masive të opozitës duke dëshmuar se është ai frymëzuesi i dhunës dhe brutalitetit policor ndaj qytetarëve. I tronditur nga masiviteti i protestës dhe nga fakti që mijëra qytetarë po kërkojnë largimin e tij për shkak të aferave të rënda korruptive, Rama ka shpërthyer në fyerje banale ndaj opozitës dhe qytetarëve. Ai i ka cilësuar protestuesit e opozitës, të cilët janë qytetarë të republikës dhe taksapagues të këtij shteti, si një lukuni të verbër.

Tanimë këto farë protestash me pisllëkun që krijojnë në bulevard, ngjajnë si jashtëderdhja në rrugë e plakut të lajthitur që i organizon… Degjenerim i pandalshëm dhe dëshpërim i pangushëllueshëm!

Të shkuara punonjësve të policisë që u plagosën e lënduan nga kjo lukuni e verbër.

Rama ka akuzuar Partinë Demokratike për dhunë ndaj institucioneve, ndërkohë që ai është organizatori i protestave më të dhunshme në historinë e shtetit shqiptar. Në reagimin e tij Rama nuk ka përmendur asnjë fjalë për sjelljen e dhunshme të policisë, e cila në mënyrë jopropocionale dhe në shkelje të protokolleve, hodhi sasi masive gazi lotsjellës dhe uji me piper ndaj protestuesve, duke u shkaktuar problem shëndetësore shumë prej tyre. Po kështu shefi i qeverisë nuk tha asnjë fjalë për skandalin e radhës së policisë, e cila shoqëroi me forcë dhe dhunoi edhe të miturin Romeo Kora. Rama u uroi shërim punonjësve të policisë, ndërkohë që nga të dhënat e ardhura nga Trauma dhe QSUT, vetëm një polic ka marrë ndihmë mjekësore pas protestës dhe është larguar menjëherë nga spitali.