Një tjetër gazetar nga SHBA i bashkohet grupit të atyre reporterëve dhe analistëve amerikanë që mendojnë se vizita e Sekretarit të Shtetit në Tiranë, Antony Blinken, shërbeu për të eklipsuar aferën e Edi Ramës me Charles McGonigal.

Këtë herë është gazetari shqiptaro-amerikan, Peter Lucas, i cili në një koment për gazetën e madhe amerikane ‘Boston Herald’ shkruan se nuk është një koincidencë që vizita e Blinken erdhi pikërisht në prag të dënimit të Charles McGonigal.

Ky i fundit akuzohet në SHBA se është korruptuar nga shefi i qeverisë shqiptare, Edi Rama. 

Por Lucas shkruan se Rama nuk është hetuar as në SHBA e aq më pak në Shqipërinë që e kontrollon.

Sipas tij, kjo vjen për shkak të lidhjeve të ngushta të Blinken me Soros dhe me Ramën.

“Ndalesa e shkurtër e Blinken në Tiranë, gjatë rrugës për në Konferencën e Sigurisë të Mynihut, shërbeu si një shpërqendrim i madh për marrëdhënien McGonigal/Rama dhe dënimin e McGonigal. Rama mirënjohës e priti Blinken sikur të ishte kryetar shteti.

Vizita simbolizonte gjithashtu miratimin e Blinken për vendimin e Ramës për të arrestuar Berishën dhe për të gjymtuar fushatën e tij.

‘Zyrtarët e korruptuar po mbajnë përgjegjësi,’ u tha Blinken gazetarëve shqiptarë, duke treguar se ai kishte parasysh Berishën, jo McGonigal apo ndonjë tjetër në Shqipëri.

Ndërkohë Berisha flet çdo natë nga ballkoni i banesës së tij në Tiranë për mbështetësit që mblidhen në rrugën poshtë.

Ashtu si Joe Biden, Edi Rama me ndihmën e Blinken po sigurohet që kundërshtari i tij të bëjë fushatë nga qelia e burgut. Politika në Shqipëri është fisnore, e poshtër dhe hakmarrëse, ashtu si në Amerikë.

Berisha nuk është shenjt me siguri, por as Rama. Shenjtorja e fundit shqiptare ishte Nënë Tereza dhe ajo mori trenin e fundit për në bregdet.