Nga Alba Kepi.
Tirana është mbushur sot me diasporianë nga e gjithë bota. Parakalojnë në bulevardin kryesor të qytetit, aty ku dikur ngrihej parada e diktatorit.
Parakalojnë aty ku me ditë e me javë mijëra shqiptarë protestonin për votën e vjedhur, të dhënat personale të vjedhura, për kontrollin e jetës përmes listave padron-(alla) Gestapo; protestonin për të rinj e të reja që po braktisin vendin e shpopullojnë kombin; protestonin për të drejtat e studentëve, për fëmijët e dhunuar në kopshte e çerdhe pa liçensa, për varfërinë e liritë e mohuara; protestonin për pronat e vjedhura, për pasuritë kombëtare të vjedhura, shtëpitë e shembura, pensionistët e harruar, ilaçet e skaduara, ushqimet e helmuara, invalidët e harruar.
Diasporianët parakalojnë krenarë me ngjyrat e kombit që i mbajnë mbi trup e mbi krye e më pas do të drekosen në një nga restorantet e hotelit të VKM për zhvillim. Thuhet se do të jenë mbi 1600 persona për drekë, si kurrë më parë kish ndodhur.
Thuhet se një kompani greke është kujdesur për dekorin e qytetit në këtë formë mega-festive, aq “mega” sa nuk kish njeri e kompani shqiptare ta merrte përsipër.
Thuhet dhe se një kompani (arti, kulture, eventesh, organizimesh e sa më shumë të kesh aq më shumë renditen në aktivitetet e saj) në zotërim të gruas së një funksionari të lartë, po menaxhon gjithçka.
Diasporianët parakalojnë në bulevardin e paradave të diktatorit e shqiptarët paguajnë të shohin se si ata gëzojnë, kërcejnë, lumturohen nën ritmin e daulleve e lahutave.
"Heeeejjjj, a ka Zot kjo tokë?!"
"Atdheu është në rrezik, o heeejjjj!" - ushtonin dikur nga Alpet shqiptare, nga maja e Korabit, tek ajo e Jezercës; nga Tomorri, Gjallica, Çika, Bjeshka, Lura, Shebeniku e çdo malësi.
Diasporianët parakalojnë e organizimi i kësaj parade shënon për qeverinë, fillimin e fushatës elektorale të 2025-ës. Misioni i tyre është diaspora. Në fillim karrota (parada) dhe më pas bastuni (vota).
Gëzuar (pa)varësinë!
P.s. Foto pak orë para Paradës në Tiranë
© SYRI.net