Kryeministri Edi Rama u shfaq sot në një konferencë për shtyp duke përsëritur një kërkesë që e kishte bërë më herët miku i tij, presidenti serb, Aleksandër Vuçiç, që KFOR të marrë kontrollin e veriut të Kosovës.

Anëtari i kryesisë së lëvizjes Vetëvendosje, Arbër Zaimi regoi pas këtij qëndrimi tjetër skandaloz të Ramës.

“Në datën 27 shtator Vuçiqi bëri kërkesë që KFOR të marrë kontrollin në veriun e Kosovës.

Në datën 28 shtator Rama bëri thirrje që KFOR të marrë kontrollin në veriun e Kosovës, duke thënë se “këtë po e kërkon vetë Kosova”.

Pyetja 1: Ende nuk e ka kuptuar Rama se për Kosovën nuk flet Vuçiqi?

Pyetja 2: A e dinë këta skërfyej se në veri të Kosovës rendin e mban policia e Kosovës, një nga organet më profesionalë e demokratikë në rajon?

Pyetja 3: Në këtë moment kur terrorizmi i mbështetur e sponsorizuar nga Serbia u zbyth, kujt i intereson të largojë nga ai territor policët e Kosovës?

Pyetja 4: Pse nuk kërkon Rama prej NATO-s që në veri të Kosovës të lejohet të vendoset edhe FSK-ja për të rritur sigurinë, a i intereson atij rritja e sovranitetit të Kosovës apo pezullimi i tij?

Pyetja 5: Pse or zotëri nuk këshillohesh edhe me shqiptarë, para se të flasësh për Kosovën? E kuptuam që e kupton Serbinë, edhe pse kriminelët e terroristët nuk ka nevojë t’i kuptojmë por t’i ndëshkojmë. Po Kosovën, Kosovën kur do ta kuptosh?” shkruan ai.