Sekretari i Përgjithshëm i Partisë së Lirisë, Tedi Blushi ka parë nga afër situatën e infrastrukturës rrugore te Njësia 9 në Tiranë.
Rrugë me gropa dhe baltë është panorama që të ofron zona te shinat e trenit.
Blushi tha se prej 8 vitesh Veliaj ka braktisur këtë zonë.
Tedi Blushi shoqërohej nga Eriona Bixha, kandidate e Partisë së Lirisë, për anëtare e Këshillit Bashkiak të Tiranës.
"Qytetarët e Njësisë Nr.9 në Tiranë i paguajnë rregullisht taksat vendore, por prej të paktën 8 vitesh nuk marrin nga Bashkia shërbimet që meritojnë.
Erion Veliaj nuk jep llogari ku i çoi taksat e tyre dhe pse në këtë njësi ende nuk ka rrugë të asfaltuara me standarde.
Me 350 milion euro buxhet vjetor, Erion Veliaj do të kishte asfaltuar edhe rrugët e Parisit. Por asnjë qindarkë nuk shpenzoi për qytetarët që banojnë në zonën e "Shinave të Trenit" në Njësinë Nr.9. Ndërkohë 100 mijë euro paguan çdo ditë për inceneratorin e Tiranës, që nuk ekziston!
Është edhe "pinok" edhe hajdut! A mund t'i besohet sërish? Ndaj më 14 Maj: Bashkë për Ndryshim! Votë për Ndëshkim!", shprehet Blushi.
Eriona Bixha u shpreh se është e dhimbshme të shohësh banorët teksa kalojnë në këto rrugë të lëna në mëshirë të fatit.
"Është një Tiranë krejt ndryshe nga ajo që shohim në mediat sociale me ato filtrat e bukura. Por realiteti i dhimbshëm është ky që ne jetojmë çdo ditë".
© SYRI.net