Boldnews.al

Ndërsa kryeministri Edi Rama rehatohej në bordin e avionit për një vizitë zyrtare në Angli, dhjetëra emigrantë shqiptarë, ndoshta në të njëjtën kohë, ngjisheshin në bordin e gomoneve për të shkuar drejt Anglisë, në një udhëtim të vështirë dhe me shumë rreziqe, deri në prag të tragjedive me humbje jete në Kanalin La Mansh.

Vetëm për vitin 2022, mbi 23 mijë shqiptarë kanë udhëtuar drejt Anglisë si emigrantë të paligjshëm, duke përdorur kalimin me gomone. Eksodet e frikshme që kanë prekur çdo familje shqiptare vetëm kreun e qeverisë sonë nuk e shqetësonin, teksa tallej me malinjitet duke i konsideruar si “çunat e Londrës”.

E vërteta është krejt ndryshe dhe këtë e dëshmon çdo fjalë e atyre emigrantëve që kanë ikur ilegalisht, mes sakrificave, parave borxh që ua jepnin trafikantëve dhe frikës për humbjen e jetëve në rrugëtimin që nga çasti në çast mund të përfundonte në tragjedi.

Rama dhe tabori që e shoqëron vendosën të mos skuqen dhe zverdhen para fakteve që ulërasin pasi shumë emigrantë, duke ndërmarrë një aventurë të tillë, me shumë mundësi do binin edhe pre e grupeve kriminale të cilët me “përkëdheli” Rama dhe Gjiknuri i quan si “çunat e Londrës”.

“Realiteti është që po shohim një numër të lartë shqiptarësh që po rrezikojnë jetën e tyre për të ndërmarrë udhëtime të paligjshme dhe të rrezikshme në Mbretërinë e Bashkuar dhe kjo vendos nën presion sistemin e azilit”, tha një zëdhënës i kryeministrit të Anglisë.

Dy ditë më parë Rama ishte në Greqi, në një vizitë jo zyrtare por që e shfrytëzoi për të publikuar pikturat e tij. Ama “piktorin shëtitës”, në qindra piktura, që i përngjajnë dinozaurëve të deformuar gjenetikisht, apo gaforreve abstrakte, nuk gjendej asnjë gomone e zhargavitur nga njeriu që me qeverisjen e tij në fakt ka pikturuar korrupsionin, varfërinë, emigrimin masiv, mungesën e drejtësisë dhe kapjen e institucioneve të pavarura.

Po aq e çuditshme është sesi emigrantët shqiptarë në Angli nuk e pritën me protestë, kreun e qeverisë së tyre që i dëboi pikërisht me keqqeverisjen e tij. Rama duhet të kthehet me gomone për të ndjekur itinerarin “Angli-Francë”, të kundërtën që bëjnë emigrantët dhe në bord si drejtues gomoneje të jetë një trafikant afgan që nuk di ta ngasë mirë, po ashtu gomonia të jetë gjysmë e shfryrë nga pesha dhe dallgët t’i përplasen në ballë dhe mjekrën e kuruar. Pas të paktën gjashtë orësh udhëtim me “gomone emigrantësh”, kryeministri duhet të vrasë mendjen sesi të lajë borxhin e marrë për këtë udhëtim të rrezikshëm.

Kjo është historia e çdo emigranti që fati e deshi të mos jetë ushqim për peshqit në Kanalin e La Manshit, por të degdiset me frikë diku në Angli, bashkë me rrezikun për tu joshur nga grupet kriminale në “shtëpitë e barit”. Sa për “barin” kryeministri do e ketë të lehtë sepse rritet bio këtu tek ne për më shumë që jemi në vit zgjedhor dhe “çunat problematik” pritet që ta bëjnë tërmet…