Skandali i Edi Ramës me drejtuesit e lartë të FBI nuk njeh kufij.

Hetuesit amerikanë kanë zbuluar se Edi Rama është takuar me ish-zyrtarin e lartë të FBI, Charles McGonigal në të paktën katër raste.

Në dy prej këtyre rasteve, Rama ka darkuar në SHBA me McGonigal. Në darkën e Uashingtonit, i pranishëm ka qenë edhe një tjetër agjent special i FBI, Lou Bladel. Ky i fundit ka qenë paraardhësi i McGonigal në krye të kundërzbulimit të FBI në Nju Jork.

Më pas krijoi një firmë konsulente, e cila mori një kontratë të majme nga qeveria shqiptare në maj të vitit 2018. Vetëm disa muaj pas takimit me Ramën, qeveria shqiptare nënshkroi një marrëveshje me “Ernst&Young” për të luftuar krimin dhe evazionin fiskal. Lou Bladel erdhi të punonte në Shqipëri dhe u emërua nga kryeministri Rama si shefi i strukturës së posaçme, të ngritur pranë qeverisë.

Bladel është emri nr. 4 në listën e emrave të lëshuar nga gjykata amerikane në nëntor për aferën ruso-shqiptare McGonigal. Ai duhej hetuar bashkë me emra të tjerë, përfshi këtu kryeministrin shqiptar, Edi Rama.

Por edhe ai u përdor nga Edi Rama si një mercenar kundër opozitës shqiptare, duke punuar në mënyrë informale në kundërshtim me rolin dhe kontratën e tij.

Këtë fakt e pati zbuluar gazetari i oborrit të Edi Ramës, Sokol Balla në emisionin e tij Real Story. Sipas tij, Bladel ishte angazhuar në mënyrë vullnetare për të verifikuar akuzat e rënda që hidheshin nga opozita në drejtim të Edi Ramës.

Rasti më i nxehtë në ato ditë ishte ai i ‘Babales’ ku implikohej Fatmir Xhafaj, por edhe dosja ‘Xhisiela’, ku implikoheshin deputetët socialistë, Taulant Balla dhe Rrahman Rraja. 

Rasti tronditës provonte që në atë kohë se Edi Rama po krijonte institucione paralele të hetimit për të sulmuar opozitën e vendit.

Ndërkohë, pasardhësi i Bladel, Charles McGonigal u angazhua përkundrejt pagesës që të investigonte një lobist të opozitës në SHBA.