Richard Grenell, i cili ka qenë shef intelegjente në administratën Trump si dhe i dërguar special për dialogun Kosovë-Serbi, ka qenë i ftuar në 'Çim Peka Live' në SYRI TV, ku në një intervistë ekskluzive ka folur gjerë e gjatë para gazetarit Çim Peka.

Ai ka treguar se aktualisht merret me sektorin privat, ku edhe është larguar nga qeveria. 

"Po përpiqem të vazhdojë punën që kam nisur në Ballkan. Ajo çka ne e kishim parashikuar, çështjen e negocimit të marrëveshjes mes Serbisë dhe Kosovës, ishte të kishim një sektor privat dhe plot vende pune që të hapeshin nga kompanitë private dhe të ulnin nivelin e papunësisë", ka theksuar Grenell.

"Unë besoj se mënyra se si ne do ti zgjidhim problemet nuk është të ulemi rreth një tavoline dhe të flasim për çështje politike, por të hapim vende pune dhe të gjejmë mënyra për të arritur një normalizim ekonomik. 

E kjo ishte pikërisht ajo që kishte në vizionin e tij z. Trump. Ai donte që kompanitë perëndimore të hynin në këtë rajon. Megjithatë gjithnjë ka ekzistuar një konflikt i perceptuar pavarësisht ka ekzistuar apo jo konflikt të vërtetë, shumë kompani amerikane dhe perëndimore, kanë perceptuar se ka një konflikt në rajon dhe ne jemi përpjekur ta zgjidhim ketë. 

Si mundet që vendet e rajonit të punojnë nga afër me njëra-tjetrën për të hapur vende pune dhe për të mbajtur të rinjtë këtu, në vend që të ikin për në Gjermani, duke menduar se kjo është e vetmja shpresë për një jetë më të mirë. Ne duam që të rinjtë të qëndrojnë në këtë vend dhe mënyra e zhvillimit ekonomik është mënyra e vetme për ta realizuar", ka shtuar ai mes tjerash.