Serbët e Kosovës, të cilët kanë bllokuar rrugët në veri të Kosovës për 19 ditë, kanë rënë dakord të fillojnë heqjen e barrikadave që nga mëngjesi i së enjtes, duke iu përkulur thirrjeve të BE-së dhe SHBA-së për të ulur tensionet, njofton Euronews.

Presidenti serb Aleksandër Vuçiç, i cili takoi serbët nga veriu i Kosovës në qytetin serb të Rashkës tha se procesi i heqjes së barrikadave do të fillojë të enjten në mëngjes. “Është një proces i gjatë dhe do të marrë pak kohë”, tha Vuçiç.

Ai shtoi gjithashtu se Shtetet e Bashkuara dhe Bashkimi Evropian, të cilët po ndërmjetësojnë bisedimet midis Beogradit dhe Prishtinës për të zgjidhur çështjet e pazgjidhura mes dy palëve, kanë garantuar se asnjë nga serbët që ngritën barrikada nuk do të ndiqet penalisht.

Heqja e barrikadave pritet të qetësojë tensionet midis Beogradit dhe Prishtinës.

Për më shumë se 20 vjet, Kosova ka qenë një burim tensioni midis Perëndimit, i cili mbështeti pavarësinë e tij, dhe Rusisë, e cila mbështet Serbinë në përpjekjet e saj për të bllokuar anëtarësimin e Kosovës në organizatat globale, përfshirë Kombet e Bashkuara.

Shtetet e Bashkuara, NATO dhe Bashkimi Evropian kërkuan vetpërmbajtje maksimale në veri të Kosovës, pasi autoritetet mbyllën një pikë të tretë kufitare të mërkurën dhe tensionet u përshkallëzuan me serbët lokalë për pavarësinë e saj në 2008.

Misioni i NATO-s në Kosovë, KFOR, tha se mbështet dialogun midis të gjitha palëve për të zbutur tensionet, të cilat kanë përfshirë postblloqe serbe në arteriet kryesore me kamionë dhe automjete të tjera të rënda si edhe përleshje të dhunshme me policinë.

Serbia e vuri ushtrinë e saj në gatishmërinë më të lartë të hënën.

Kremlini, nga ana e tij, i hodhi poshtë  pretendimet e Ministrit të Brendshëm të Kosovës se Rusia po ndikonte në Serbi për të destabilizuar Kosovën, duke thënë se Serbia po mbronte të drejtat e serbëve etnikë.

Një ish-polic serb i Kosovës, arrestimi i të cilit shkaktoi protesta të dhunshme nga minoriteti serb i Kosovës, u lirua nga paraburgimi dhe u vendos në arrest shtëpiak pas një kërkese nga prokuroria, tha një zëdhënës i Gjykatës Themelore të Prishtinës për Reuters.

Dejan Pantiç u arrestua më 10 dhjetor për sulm ndaj një oficeri policie në shërbim. Që atëherë, serbët në veri të Kosovës kanë shkëmbyer zjarr me policinë dhe kanë ngritur postblloqe, duke kërkuar lirimin e tij.

Vendimi i gjykatës zemëroi zyrtarët e qeverisë së Kosovës, përfshirë Kryeministrin Albin Kurti dhe Ministren e Drejtësisë Albulena Haxhiu, njofton Euronews.

Pantiç ishte një nga shumë serbët që u larguan nga radhët e Policisë dhe institucionet e tjera pasi Prishtina tha se do të zbatonte një ligj që u kërkon serbëve të heqin targat e makinave të lëshuara nga Serbia që datojnë para kryengritjes guerile të viteve 1998-99 që çoi në pavarësinë e Kosovës.

Serbët në Kosovën veriore, që besojnë se janë ende pjesë e Serbisë, i rezistojnë çdo lëvizjeje që ata e shohin si antiserbe.

Dy pika kufitare midis Serbisë dhe Kosovës u mbyllën më 10 dhjetor dhe një e tretë, më e madhja për transportin e mallrave rrugore, ajo e Merdares, u mbyll të mërkurën, duke ndërprerë udhëtimet e kosovarëve që punojnë në vende të tjera në Evropëm që të ktheheshin në atdhe për pushime.

Rreth 50,000 serbë që jetojnë në veri të Kosovës refuzojnë të njohin qeverinë në Prishtinë apo statusin e Kosovës si një vend më vete. Ata kanë mbështetjen e shumë serbëve në Serbi dhe qeverisë së saj, shkruan Euroonews.

Kosova me shumicë shqiptare shpalli pavarësinë me mbështetjen e Perëndimit, pas një lufte të viteve 1998-99 në të cilën NATO ndërhyri për të mbrojtur qytetarët shqiptarë etnikë.