Politologu Flamur Gashi komentoi në emisionin 'Task Force' në Syri Tv protestën që do të mbahet nga opozita dhe qytetarët më datë 6 dhjetor, ditë kur do të mbahet edhe samiti BE-Ballkani Perëndimor në Tiranë.

Politologu Flamur Gashi u shpreh se në pesë vitet e fundit kudo që është zhvilluar një samit i rëndësishëm evropian në vendet më të rëndësishme të BE, ka pasur protestë.

"Më thoni një rast ku s'ka patur protestë. Qeveria e tanishme këtu tek ne, shoqërinë civile ose e ka ngulfatur ose e ka blerë.

E kemi parë çfarë ka ndodhur me shoqërinë civile nga protestat e studentëve, protesta për vrasjen e të riut në mes të Tiranës, këto janë sfumuar se ka pasur ndërhyrje."-tha Gashi.

Flamur Gashi u shpreh se s'ka asnjë informacion për cënim të rëndë të sigurisë publike dhe kemi një hiperbolizim të kësaj çështje nga qeveria për çështjen e sigurisë për të ndaluar protestën.

"Protesta është në të mirë të qeverisë, qeveria duhet të tregojë se jemi vend i lirë dhe demokratik që nuk i ndalojmë protestat. Nëse ka incidente, fatura i shkon qeverisë. Duhet të sigurojë rendin dhe sigurinë publike."-tha Gashi.