Kryetari aktual i PD, Lulzim Basha ka bërë një deklaratë të fortë në mbledhjen me kryetarët e degëve sot në selinë blu. 

Basha është shprehur se në 11 dhjetor do të ketë miting nga Sali Berisha dhe jo mbledhje të Kuvendit Kombëtar. 

Ai ka paralajmëruar se kushdo që merr pjesë në Kuvendin e datës 11 dhe krijohen institucione paralele, do të përballet me sanksionet e statutit, duke kërcënuar kështu me përjashtim nga PD të 4200 firmëtarëve zyrtarë deri tani, por edhe të liderit historik Sali Berisha.  

"Do ta zbatoj statutin ndaj kujtdo. Kush shkel vendimin e Kryesisë së partisë, fatin e ka të caktuar nga statuti i partisë, përfshirë këtu edhe Sali Berishën. Boll është boll. Asnjë anëtar nuk është mbi statutin dhe nuk është mbi të tjerët", është shprehur Basha. 

Kuvendi legjitim i PD, ka thënë Basha, është i datës 18 dhjetor, ndërsa 11 dhjetorin e konsideroi sërish miting të Sali Berishës. 

Nuk kuptohet se si mendon ta realizojë këtë Basha, kur 60 përqind e strukturave kanë firmosur de facto për shkarkimin e tij, dhe sipas të gjitha sondazheve, ai ka kundër mbi 80% të anëtarësisë së PD.