Në “tangon” e stërgjatë që po zhvillohet mes Lulzim Bashës dhe Edi Ramës në foltoren e parlamentit, kryeministri në një moment të caktuar i është kthyer ashpër kreut të PD-së, duke i thënë troç se, “ku ta gjej të të kem gjithmonë ty përballë”. Gjithashtu Rama i kërkoi Bashës që  të mos 'bëjë të fortin' në Kuvend duke shtuar se ' të kam xhan'.

Për Edi Ramën një opozitë e drejtuar nga Lulzim Basha është komode dhe nuk e rrezikon aspak pushtetin e tij. Deklaratën e bëri vetë Rama sot gjatë fjalës së tij në Parlament.

‘Ku ta gjej të të kem gjithmonë ty përballë’, i tha Rama, Bashës në kohën kur bëheshin replikat.

“Të lutem, mos na ço gjuhën aty ku të dhemb dhëmbi ty. Kur thua ti që dua apo nuk dua, do të të kem përballë ty, të them se unë pikërisht ty të dua përballë. Të kam dashur, të dua dhe do të të dua gjithmonë. E kam seriozisht, sepse dua që të ngremë nivelin këtu. Sepse ti vjen këtu duke lexuar abetaren që të ka mësuar llumi. Mos ji karikatura e llumit. Ti duhet të provosh se megjithëse ai llum të nxori në krye, ti duhet të jesh diçka tjetër sot, duhet të rilindësh. Ndërvepro këtu me gjuhën e fakteve. Nuk ka nevojë as të shpifësh, as të akuzosh dhe as të kriminalizosh dynjanë me fakte. Kjo është opozita”, u shpreh Rama.