Partia Demokratike dorëzoi sot në Kuvend kërkesën për t’u ngritur një Komision i Posaçëm për Reformën Zgjedhore, me qëllim zbatimin e rekomandimeve të OSBE/ODIHR.
Menjëherë pas këtij propozimi, kryeministri Edi Rama zhvilloi një takim me 12 drejtuesit e qarqeve në selinë rozë.
Gazetarja e Syri Tv, Ambrozia Meta raporton, duke iu referuar burimeve nga mbledhja, se kryeministri Edi Rama ka shprehur dakordësinë për ngritjen e komisionit të 'Zgjedhores'.
Kreu i qeverisë ka qenë i prerë duke udhëzuar të dijët që Reforma Zgjedhore të miratohet menjëherë në Parlament, ashtu siç e kërkon opozita.
Selia blu kërkon që komisioni të ngrihet me përbërje të barabartë mes anëtarëve të mazhorancës dhe opozitës.
Nëse miratohet Komisioni duhet që ta ushtrojë veprimtarinë për një afat 6-mujor nga data e miratimit të vendimit. Për Partinë Demokratike, problematikat dhe rekomandimet në raportin e ODIHR për zgjedhjet e 25 Prillit meritojnë një trajtim të veçantë nga Kuvendi në mënyrë që të adresohen nëpërmjet nismave ligjore.
Pas takimit me drejtuesit e qarqeve, Rama dha një prononcim për mediat nga ku deklaroi se do të jetë i hapur për të shqyrtuar çdo propozim i PD si dhe për t'u ulur në tryezë me kryetarin aktual të PD, Lulzim Basha.
© SYRI.net