“Nga lufta largohet veç ai largohet”, deklaroi lideri historik demokrat Sali Berisha nga Shkodra, ku u prit me brohoritje.

“Vendosa të kthehem, të vazhdoj me fuqi të shumëfishuar mbrojtjen e interesit publik, mbrojtjen e interesit kombëtar. Ky ishte një motiv po kaq i madh, po kaq i rëndësishëm për të bërë gjithçka bashkë me ju, për të ngritur në këmbë PD-në, për ta çuar atë drejt fitores,” tha Berisha.

“Ju garantoj se do të bëjmë gjithçka së bashku. Së pari, që ju të zgjidhni njerëzit që u besoni më shumë. Do bëjmë gjithçka që vota juaj të dalë në dritën e diellit. Të mos lozë kush me votën tuaj.

Kur Lulzim Basha kandidoi për kryetar bashkie, doli problemi i votave të hedhura gabim në kutitë e tjera. Por ato në çdo kod ndërkombëtar ato janë pranuar si vota të vlefshme. Më erdhën një përfaqësi e lartë e më thanë të ndërpresim numërimin. U thashë se kur shqiptarët të mos mund të numërojnë votën e tyre, nuk ka më pavarësi. Të paktën sa të jem unë këtu, u thashë. Do numërojnë votat me pesë kamera. Dhe të dalë kush të thotë se njëra është e pavlefshme. Votat u numëruan dhe nuk më shkoi mendja që të luaja me votën e lirë.

Prandaj do kthej votën e lirë. Do hapemi me emigracionin dhe diasporën. Do strukturohemi me shtyllat tona pa asnjë diskutim. Në piedestal të përndjekurit, pronarët dhe të gjitha vlerat tjera të shoqërisë. Do ngrihemi në këmbë dhe do ecim të sigurt të fitores.

Lumenjtë e gënjeshtrave të Edi Ramës do i shkrijmë si brymën para diellit. Do të ngjallim shpresë në çdo zemër dhe vatër shqiptare. Por kjo kërkon nga të gjithë që t’i themi vetes çdo ditë: të ndryshojë, të ndryshojë, të ndryshojë.

Fillimi ynë i ri është rruga drejt fitores,” tha Berisha.