Kryeministri Edi Rama ka zbardhur detaje nga takimi me kryediplomatin e BE-së, Josep Borrell, gjatë vizitës zyrtare në Abu Dhabi. 

Përmes një mesazhi në ‘Facebook’ kreu i qeverisë shqiptare theksoi se me Përfaqësuesin e Bashkimit Europian për Politikën e Jashtme Josep Borell, folën për Samitin e javës së ardhshme mes BE-së dhe Ballkanit Perëndimor, për panoramën e situatës në rajon, si edhe për konfliktin e hapur nga Bullgaria me Maqedoninë e Veriut.

Sipas Ramës në këtë konflikt është marrë peng edhe Shqipëria, duke iu referuar kështu mosçeljes së negociatave për anëtarësim në BE. 

“Takimi me Josep Borrell, kryediplomatin e BE- së dhe ndërmjetësuesin e bisedimeve Kosovë-Serbi, me të cilin folëm për Samitin e javës së ardhshme mes BE-së dhe Ballkanit Perëndimor, për panoramën e situatës në rajon, si edhe për konfliktin e hapur nga Bullgaria me Maqedoninë e Veriut, ku është marrë peng edhe Shqipëria”, shkruan Rama.

Më herët ishte Përfaqësuesi i Bashkimit Europian për Politikën e Jashtme Josep Borell njoftoi se kishte takuar Ramën duke publikuar foto dhe detaje nga takimi. Borrell tha se në fokus të bisedës me Ramën ishte rrugëtimi europian i Shqipërisë dhe vijimi i reformave.