Tashmë për të protestuar nuk është më e nevojshme për të marrë leje nga organet kompetente në këtë rast, policia, por mjafton vetëm me një njoftim.

Vendimin e ka dhënë Gjykata Kushtetuese, e cila ka shfuqizuar nenin 262 të Kodit Penal për protestat dhe tubimet.

Në këtë nen parashikohej se për të organizuar një grumbullim apo manifestim duhej të merrej leje nga organet kompetente, madje nëse kjo shkelje, kishte masa me gjobë deri në burgim.

Gjykata Kushtetuese vendosi që tashmë mjafton që të njoftohen organet kompetentet për të organizuar një protestë dhe ky vendim hyn në fuqi 6 muaj pas botimit në Fletoren Zyrtare.

Njoftim nga Gjykata Kushtetuese

Gjykata Kushtetuese e Republikës së Shqipërisë në datën 04.05.2021 mori në shqyrtim në seancë plenare, mbi bazë dokumentesh, çështjen me kërkues Gjykatën e Apelit Shkodër, me objekt: “Shfuqizimi i togfjalëshit “pa marrë më parë lejen nga organi kompetent sipas dispozitave të veçanta” në paragrafin e parë të nenit 262 të Kodit Penal të Republikës së Shqipërisë, si i papajtueshëm me nenet 17, pika 1 dhe 47 të Kushtetutës së Republikës së Shqipërisë”.

Në përfundim të shqyrtimit Gjykata Kushtetuese

VENDOSI:

Pranimin e kërkesës.

2. Shfuqizimin e shprehjes “pa marrë më parë lejen nga organi kompetent sipas dispozitave të veçanta” në paragrafin e parë të nenit 262 të Kodit Penal.

3. Detyrimin e Kuvendit të plotësojë normën ligjore nga data e shpalljes së vendimit të Gjykatës Kushtetuese deri në hyrjen në fuqi të tij.

4. Ky vendim është përfundimtar dhe hyn në fuqi 6 muaj pas botimit në Fletoren Zyrtare.

Vendimi përfundimtar do të shpallet i arsyetuar brenda afateve ligjore të parashikuara nga ligji nr. 8577, datë 10.02.2000 “Për organizimin dhe funksionimin e Gjykatës Kushtetuese të Republikës së Shqipërisë”, i ndryshuar.

NENI 262 I KODIT PENAL

Organizimi dhe pjesëmarrja në grumbullime e manifestime të paligjshme (Shtuar paragrafi III me ligjin nr.8733, datë 24.1.2001, neni 59) Organizimi i grumbullimeve dhe i manifestimeve të personave në sheshe dhe vende të kalimit publik, pa marrë më parë lejen nga organi kompetent sipas dispozitave të veçanta apo kur nga organizatorët shkelen kushtet e parashtruara në kërkesën për dhënie të lejes, përbën kundërvajtje penale dhe dënohet me gjobë ose me burgim gjer në një vit. Pjesëmarrja në një grumbullim apo manifestim të paligjshëm edhe pas paralajmërimit të bërë për shpërndarje, përbën kundërvajtje penale dhe dënohet me gjobë ose me burgim gjer në tre muaj. Po kjo vepër, e kryer më shumë se një herë ose kur ka sjellë pasoja të rënda, përbën kundërvajtje penale dhe dënohet me gjobë ose me burgim gjer në dy vjet.