Në vazhdën e takimeve për zgjedhjet e 25 prillit, Kryetari i FRPD-së, Belind Këlliçi zhvilloi ditën e sotme një diskutim me të rinj në Kashar.

 Duke adresuar kritika në drejtim të qeverisë Rama, Këlliçi pyeti të rinjtë e pranishëm se “a mundet ndonjëri nga ju të më thotë një premtim të qeverisë për rininë“?

“PD ka një program të dedikuar për të rinjtë”, vijoi ai, duke listuar disa nga angazhimet programore të PD, si zerimi i tarifave universitare për të rinjtë nga familje me të ardhura deri në 64 mijë lekë të reja dhe praktikat e paguara 30 mijë lekë çdo muaj për një vit.

Gjithashtu Këlliçi nuk la pa përmendur kryebashkiakun e Tiranës, Erion Veliaj dhe premtimet e këtij të fundit për zgjedhjet e 25 prillit.

“Para 4 ditësh Veliaj tha se do ndërtojë 3 shkolla në zonën e Unazës së Re, por ka 6 vjet në krye të bashkisë dhe nuk ka bërë asgjë”, tha ai.

Në fjalën e tij, Këlliçi përmendi disa herë dyshen Rama-Veliaj, që sipas tij janë përgjegjësit kryesorë që Shqipëria po zbrazet nga të rinjtë. “Duhet të largojmë këtë dyshe që Shqipëria mos të qëndrojë në vendnumëro“, theksoi ai.