Ramush Haradinaj nëpërmjet një shënimi të shkurtër në faqen e tij në Facebook, ka kërkuar nga fituesit e zgjedhjeve në Kosovë, Vetëvendosja, që të krijojnë sa më shpejtë institucionet e reja qeverisëse dhe të nisin dialogun e brendshëm e të jashtëm.

Haradinaj gjithashtu ka shfaqur kritika ndaj Vetëvendosjes, për vendimin e kësaj partie për të marrë pjesë në zgjedhjet e përgjithshme të 25 prillit në Shqipëri.

“Kosova sot, prej fituesve të rinj të zgjedhjeve pret krijimin sa më shpejt të institucioneve dhe përmbushjen e obligimeve që dalin nga Kushtetuta, duke përfshirë këtu dialogun e brendshëm dhe të jashtëm, që të vetmin përcaktim ka ruajtjen e sovranitetit dhe të integritetit të vendit e karakterit unitar të shtetit.

Dialogu i brendshëm vetëm me përfaqësues minorë e pa ndonjë fuqi elektorale të serbëve nga pjesa qendrore e Kosovës, jo vetëm se mund të jetë selektiv, por edhe sinjal i keq për karakterin unitar të Shtetit.

E konsideroj po ashtu të parakohshme ngutjen për të marrë pjesë në zgjedhjet parlamentare në Shqipëri dhe druaj se, në mos për vetë pjesëmarrësit në këto zgjedhje, të tjerët do ta shohin si një hile dhe mundësi për të rikthyer skenarë të vjetër për ndarje.

E pakta kjo mund të konsiderohet si një lloj pafuqie për tu përballur me integrimin e patjetërsueshëm të veriut të vendit!”, shkruan në faqen e tij në FB Haradinaj