Tashmë skandali i inceneratorëve ju ka mbetur në dorë, si një “minë me sahat”.
I pari kryeministri Rama, i cili i ka vënë gjoksin personalisht dhe gjithë vargani i ministrave dhe protagonistëve në këtë aferë, që shkon afro gjysmë miliardi euro, kanë nisur një fushatë të paprecedentë për të mbuluar miliardat që kanë marrë e do të marrin, “në emër të plehrave”.
E këtë po e bëjnë me propagandë të shfrenuar dhe të paguar shtrenjtë.
Së fundmi inceneratori i Sharrës, për të cilin po zbulohen dita ditës fakte të rënda, që po e nxjerrin hapur si një skemë mafioze sipas të cilët po rripen jo vetëm taksapaguesit shqiptarë në përgjithësi, por edhe biznesmenët dhe qytetarët e thjeshtë, ka prodhuar një Video-Spot në 3D.
Propaganda edhe në këtë reklamë të paguar shtrenjtë është e “ndritshme”, si në çdo spot në 3D që prodhon Rilindja për rrugë e aeroporte, që i përkasin “Askundit”.
Ideja është për të sugjestionuar shqiptarët dhe qytetarët e Tiranës me alternativën absurde:
Doni të jetonit mes plehrave, apo mes natyrës së virgjër dhe ajrit të pastër?!
Por se sa kushton kjo për xhepat e qytetarëve asnjë fjalë. Se mund që të jetohet pa “plehrat nëpër këmbë”, por pa vjedhur miliona euro çdo muaj, as që e çojnë nëpër mend!
Të gjithë, opinion publik, mediat kritike dhe opozita që e ka thyer në kauzë të rëndësishme këtë skandal mafioz janë për pastrimin nga mbetjet të qyteteve dhe të gjithë Shqipërisë.
Por jo me formulën “1 për punën dhe 9 për vete”, siç po funksionon ky biznes gjigant i Edi Ramës, Arben Hametajt, Erion Veliajt&Co, i gjithi i paguar (430 milion euro) nga paratë e taksapaguesve.
Ndaj çdo televizion, çdo portal apo media që transmeton këtë video-alibi për aferën e padëgjuar të Sharrës, dijeni se është i blerë.
Madje shumë shtrenjtë, por gjithmonë me paratë tuaja!
© SYRI.net