Pas deklaratës së Kryeministrit Edi Rama se ai nuk kishte dijeni për ndonjë plan rimëkëmbjeje të ekonomisë prej krizës së shkaktuar nga pandemia, ka reaguar kryetari i PD-së Lulzim Basha i cili tha sot se po, e besonte se Rama nuk e kishte dëgjuar Planin me 5 pika.
Basha theksoi se mund të ishte i vetmi në Shqipëri ndoshta që e besonte, sepse Rama gjithë këto vite nuk i kishte dëgjuar kurrë shqiptarët dhe as problemet e tyre
“Ditët kalojnë dhe njerëzit nuk marrin asnjë ndihmë dhe asnjë zotim nga qeveria për t’i ndihmuar, - tha Basha. - Sot kemi marrë të tjera të dhëna tronditëse që tregojnë se ekonomia po zhytet dhe numri i të papunëve po shtohet me qindra në ditë, se numri i bizneseve që po mbyllen po rritet krahasuar me muajt e tjerë të këtij viti.
Shëndetësia është në kufijtë e kolapsit dhe personeli ka arritur në pikën më të ulët përsa i përket aftësive për të përballuar rritjen e infeksioneve nga COVID-it.
Siguria e fëmijëve dhe e mësuesve në shkolla është lënë në mëshirë të fatit.
Qeveria dhe Kryeministri nuk kanë marrë asnjë masë për të korrigjuar problemet e mëdha që nga furnzimi me ujë për të larë duart e deri tek pajisja me maska e dezinfektant.
Kjo është gjendja sot në përkeqësim të thellë.
Ndërkohë pyetjes suaj sot paradite nëse ka ndërmend ta zbatojë Planin me 5 pika që ne kemi shpalosur prej dy javësh, Rama u është përgjigjur se nuk ka dëgjuar për këtë plan.
Në fakt unë e besoj!
Pavarësisht se shumica dërmuese juaja këtu nuk e besojnë dhe shumica e shqiptarëve nuk e besojnë, unë zgjedh ta besoj që nuk e ka dëgjuar se nuk ka ditë por javë, muaj, vite që Rama nuk dëgjon njerëzit nuk dëgjon prindërit që kanë humbur vendin e punës dhe nuk iu ka mbetur asnjë alternativë, nuk dëgjon biznesin, sipërmarrjen që tani po i dorëzohet falimentimit, nuk dëgjon mjekët.
Nuk dëgjon mësuesit për gjendjen katastrofike në shkolla.
Nuk dëgjon shqiptarët që ditë për ditë nga terminali i autobuzëve ndërkombëtarë mbushin autobusët e kur nuk dëgjon asnjë shqiptar natyrisht që nuk dëgjon as planin tonë, rrugëdaljen për t’u përballur me këtë krizë, ndaj ndoshta - duke rrezikuar të jem i vetmi në Shqipëri e besoj që nuk e ka dëgjuar planin, ndonëse nuk ka mbetur shqiptar pa e dëgjuar falë raportimit tuaj si media."
© SYRI.net