Ulja e detyruar, thuajse rrëzimi i një helikopteri ushtarak shqiptar “Cougar” në fushat e Italisë më 30 korrik 2020, duket se fsheh një aferë të madhe korruptive prej miliona eurosh në Ministrinë e Mbrojtjes së Shqipërisë, e cila po tenton ta kalojë në heshtje të plotë këtë incident të rrezikshëm dhe të kushtueshëm.

Mbi faktet ka hedhur dritë zbuluar Gjeneral Piro Ahmetaj, këshilltar për Sigurinë Kombëtare në PD, ish-Zëvendës Shef i Shtabit të Përgjithshëm të FA.

Gjeneral Ahmetaj i ka bërë një thirrje të drejtpërdrejtë SPAK-ut të hetojë me imtësi ngjarjen dhe ka ngritur 12 pyetje, për të ndihmuar në zbulimin e gjithë së vërtetës që nuk është thjesht e vetëm rrëzim i rastit i një helikopteri “Cougar”prej 17 milionë eurosh.

Në një mesazh të tijin, Gjeneral Ahmetaj shprehet:

"Në dt. 30.07.2020, mediat italiane informuan se “falë aftësisë së pilotëve, u shmang tragjedia”, një helikopter i Forcave Ajrore të Republikës së Shqipërisë bëri ulje emergjente në rajonin e Peskarës, Itali.

Mbas këtij lajmi, një ekspert i përgjegjshëm i Forcave Ajrore më ka informuar në mirëbesim për një kontratë korruptive të Ministrisë së Mbrojtjes për mirëmbajtjen e helikopterëve, duke rrezikuar seriozisht edhe jetën e pilotëve, duke shkatërruar kapacitete kritike të FA si dhe pasurinë kombëtare, helikopteri COUGAR me vlerë 17 milionë euro, fshihet mbas këtij rasti.

Për të ndihmuar organet e drejtësisë, SPAK, për të nisur menjëherë hetimet, kam ndërtuar 12 pyetje publike dhe fare të thjeshta ndaj institucionit të Ministrisë së Mbrojtjes:

1. Pse Ministria e Mbrojtjes dhe autoritetet ushtarake përgjegjëse vijojnë të mos kenë asnjë deklaratë zyrtare për këtë prag-tragjedi me jetën e pilotëve dhe helikopterin?!

2. Pse është ndërprerë kontrata e shërbimeve të mirëmbajtjes me kompaninë e mirënjohur gjermane “Airbus” (kompania prodhuese e këtyre helikopterëve), dhe cilat janë arsyet që kjo kompani është larguar nga Rinasi (RSH), pas rreth 8 vitesh?!

3. Kush është kontrata zyrtare e lidhur me kompaninë franceze “Artelis SAS”, e cila është më së shumti për transportin ajror në ndërtimin e linjave elektrike dhe teleferikëve, etj?!

4. Kush është kostoja e shërbimeve të helikopterëve nga “Artelis SAS”, kush është cilësia, si dhe sa është në total (përfshirë dhe transportin) diferenca e kostos me kompaninë Airbus?!

5. Kush janë arsyet ekonomike që helikopterët transportohen me trajler nga Shqipëria në Francë dhe sa është kosto shtesë?! Pasi ky është një rast unikal në botë, jo vetëm për koston e transportit që i mbivendoset asaj të mirëmbajtjes, por për prestigjin e një shteti!!

6. Kush do të përgjigjet për dëmin ekonomik, përfshirë transportin, kompania “Artelis SAS” apo shteti shqiptar?! Aktualisht helikopteri COUGAR ka një kosto dëmi tepër të lartë për t’u transportuar dhe riparuar përsëri.

7. A e ka ky helikopter uljen e dytë të detyruar (edhe para tre javësh?) dhe a është rikthyer te kompania franceze “Artelis SAS”? Si, sa dhe kush e ka përballuar koston shtesë?!

8. Sipas ekspertëve italiane “shkathtësia e pilotëve shmangu një katastrofë ajrore” dhe pyetja kritike mbetet nëse merret në konsideratë “pesha e rrezikut” për jetën e pilotëvë!

9. A janë pilotët të çertifikuar, me eksperiencë fluturimi në lartësi të ulëta dhe mbi ujë? Ka shkelje të rregullave të fluturimit, të shërbimeve të mirëmbajtjes, karburantit, etj ?!

10. A vazhdon të jetë në “arat e Pescarës”, Itali, helikopteri, kush janë procedurat standarte dhe praktika e plotë e kontratave të mirëmbajtjes së helikopterëve të Forcave të Armatosura?!

11. A janë pezulluar gjatë vitit 2018 nga puna për 8 muaj, 6 specialistë përgjegjës per shërbimet e mirëmbajtjes së helikopterëve në bashkepunim me kompaninë Airbus ?!

12. Pse Ministria e Mbrojtjes prej 2 vitesh, shkel me dy këmbët Kushtetutën, pika 1, neni 168 dhe pika 3, neni 169 dhe funksioni i Komandantit të Forcave Ajrore si dhe Forcave Detare ushtrohet nga zëvëndësi?!

Në shtesë, sjellim në kujtesë rrëzimin e helikopterit në liqenin e Shkodrës, para 4 vitesh, ku humbën jetën dy pilotë, të cilët qeveria në ikje i dekoroi “nxitimthi” Dëshmorë të Atdheut.

Po a mjafton vetëm dekorimi si përgjegjësi shtetërore për të mjekuar dhimbjen, mësuar nga gabimet dhe ndëshkuar zyrtarët e korruptuar, në mënyrë që rastet fatale të mos përsëriten?!

Drejtësia ende nuk ka folur, nëse ka patur hetim rreth këtij aksidentit fatal, kush janë përgjegjësit për dy jetët e humbura si dhe shkatërrimin e pasurisë kombëtare (Helikopterin EC-145)?!

Në përmbledhje të sa më sipër, shpresoj që SPAK do ta hetojë me përparësi këtë rast si dhe do t’i c?ojë përpara ligjit zyrtarët e papërgjegjshëm, që të verbuar nga babëzia për të vjedhur ç'ka mbetur, kanë rrezikuar seriozisht jetën e pilotëve, kanë shkatërruar kapacitete kritike të Forcave të Armatosura ose pasurisë kombëtare si dhe kanë dëmtuar rëndë imazhin e Republikës së Shqipërisë në NATO."