Partia Popullore Europiane PPE ka uruar konsensusin për marrëveshjen në Këshillin Politik si dhe ka kërkuar miratim sa më shpejt të Paketës së ndryshuar për Kodin Zgjedhor dhe zbatimin e saj në zgjedhjet e ardhshme parlamentare e lokale.

Përmes një postimi në Facebook, eurodeputeti gjerman Michael Gahler, teksa përshëndet arritjen e marrëveshjes në tryezën e Këshillit Politik, i bën thirrje mazhorancës të mos tentojë të bëjë ndryshime të njëanshme dhe që dëmtojnë konsensusin mes palëve.

"Ne përshendesim konsensusin e qëndrueshëm të partive që përfshijne Partinë Socialiste në pushtet dhe Partinë Demokratike (anëtare e PPE) dhe presim miratimin e shpejtë zyrtar të kësaj pakete. Çdo deklaratë nga partia në pushtet për ndryshime të tjera të njëanshme shkon kundër konsensusit të arritur", thuhet ndër të tjera në reagimin e Gahler, raporton Syri.net.

Edhe pse ndryshimet për Reformën Zgjedhore janë firmosur njëherë në rezidencën e ambasadores amerikane prej përfaqësuesve të opozitës reale (Bylykbashi-Vasili), asaj parlamentare (Rudina Hajdari) dhe të dërguarit të Edi Ramës (Damian Gjiknuri), loja e për kryeministrit vazhdon.

Në këtë vazhdë mësohet se kryeministri Rama do të takojë sot (e martë) në orën 19:00 ‘opozitën parlamentare’ për të biseduar për Reformën Zgjedhore.

Takimi është kërkuar nga opozita në Kuvend dhe në të do të marrë pjesë kryeministri Rama, kreu i grupit parlamentar Balla dhe përfaqësues të opozitës në kuvend me në krye Myslym Murrizin.

Më herët tre kryetarët e grupeve parlamentare Murrizi, Stojku dhe Musai kanë deklaruar se deputetët e opozitës në parlament nuk do të votojnë draft-reformën Zgjedhore nëse nuk plotësohen kërkesat e saj, për hapje të listave të kandidatëve për deputetë. /A.R, Syri.net

Reagimi i plotë i Michael Gahler:

"Së bashku si Grupi i PPE në Parlamentin Evropian, urojmë partitë në Këshillin Politik Shqiptar, i cili pas Marrëveshjes së 5 Qershorit, ra dakord për paketën e reformës zgjedhore. Ne e lavdërojmë konsensusin e Partisë Socialiste në pushtet dhe Partinë Demokratike (anëtare e PPE) dhe presim miratimin e shpejtë zyrtar të kësaj pakete.

Çdo përpjekje e partisë në pushtet për ndryshime të njëanshme të tjera shkon kundër konsensusit të arritur.

Ky konsensus është kusht kyç për çeljen e negociatave për anëtarësim në BE.

Këshilli Evropian në Mars në të vërtetë kërkoi që Shqipëria të sqarojë ligjshmërinë e zgjedhjeve lokale të vitit 2019. Fakti që qeveritë lokale në Shqipëri drejtohen nga një parti e vetme, e cënon nocionin themelor të një demokracie pluraliste.

Këto janë tre nga 15 kushtet e rëndësishme që Shqipëria duhet të përmbushë përpara fillimit të negociatave për anëtarësim  në BE.

Opinionet e fundit të Komisionit të Venecias për lirinë e mediave dhe gjyqësorit duhet të zbatohen plotësisht në mënyrë që të korrigjohen devijimet e mëparshme dhe të ecin përpara. Gjithashtu duhet të fillohet procesi penal lidhur me pretendimet e blerjes së votave në zgjedhjet e kaluara, përfshirë ato në Dosjet 184 dhe 339.

Të 15 Kushtet u vendosën në Mars nga Këshilli Evropian dhe u konfirmuan muajin e kaluar në Parlamentin Evropian nga një shumicë e madhe ndër-partiake.

Grupi Parlamentar i PEE vazhdon të mbështesë Shqipërinë në rrugën e saj drejt BE".